Son illər Balakən rayonu ərazisində 518 mindən çox tut tingi əkilib
Balakən, 7 yanvar, Mustafa Dadaşov, AZƏRTAC
Gəlirli sahələrdən olan baramaçılığın inkişafının təmin edilməsində ipəkqurdunun yem bazasının bərpası xüsusi əhəmiyyət kəsb edir. Bu sahənin yem bazasının möhkəmləndirilməsi məqsədilə son illər Balakən rayonunda da yeni tut bağlarının salınması istiqamətində zəruri tədbirlər həyata keçirilib. Belə ki, təkcə keçən ilin payız mövsümündə rayonda baramaçılıqla məşğul olan təsərrüfatçıların bağ sahələrində 25,5 mindən çox yerli tut tingi əkilib.
Bu barədə AZƏRTAC-ın bölgə müxbirinə Balakən Dövlət Aqrar İnkişaf Mərkəzinin bitkiçilik sektorunun müdiri Şahin Rəhimli məlumat verib.
Qurum rəsmisi bildirib ki, ümumiyyətlə, son illər yeni tut bağlarının salınması məqsədilə rayon ərazisində 518,2 mindən çox tut tingi əkilib. Bunun 276 min ədədi Çin Xalq Respublikasından ölkəmizə gətirilən calaq olunmuş tinglər, 242,2 min ədədi isə yerli tut tingləridir.
Xatırladaq ki, ötən mövsümdə balakənli kümçülər 32 tonadək yaş barama istehsal edərək “Azəripək” MMC-yə təhvil veriblər.
Bölmənin digər xəbərləri
