Son illərdə reabilitasiya xidməti göstərilənlərin illik sayı 10,4 dəfə artıb
Bakı, 16 yanvar, AZƏRTAC
Prezident İlham Əliyevin tapşırıqları əsasında Əmək və Əhalinin Sosial Müdafiəsi Nazirliyi tərəfindən son illər aparılan sosial islahatların mühüm bir istiqaməti də əlilliyi olan şəxslərin reabilitasiyası sahəsini əhatə edib.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, ölkəmizdə müasir reabilitasiya sistemi qurulmaqla, yeni reabilitasiya mərkəzləri açılıb. Xidmətlər spektri qabaqcıl dünya təcrübəsinə uyğun yeni istiqamətlər üzrə xeyli genişləndirilib. Habelə icma əsaslı, telereabilitasiya, səyyar formalarda da reabilitasiya xidmətlərinin tətbiqinə başlanıb.
Görülən həmin tədbirlər nəticəsində reabilitasiya xidməti göstərilən əlilliyi olan şəxslərin illik sayı 2018-ci ildəki 11,9 mindən 10,4 dəfə artaraq 2024-cü ildə 123,3 minə çatıb.
Eyni zamanda, əlilliyi olan şəxslərin reabilitasiya vasitələri ilə təminatı gücləndirilib. Onlara dövlət büdcəsi hesabına verilən reabilitasiya vasitələri növlərinin sayı 4 dəfəyədək artırılaraq 34-dən 130-a çatdırılıb.
Həmin dövrdə əlilliyi olan şəxslərə təqdim edilən reabilitasiya vasitələrinin illik sayı 2,7 dəfə artaraq 97 minə çatıb.
Bölmənin digər xəbərləri
