SON MƏNZİLƏ

05.04.2004 [22:41]
Çap et
A⁺ A^-

Azərbaycanın pedaqoji ictimaiyyəti aprelin 5-də respublikanın əməkdar müəllimi, Prezidentin fərdi təqaüdçüsü Sona Tağıyevanı son mənzilə yola salmışdır. Həyatını gənc nəslin təlim-tərbiyəsinə həsr etmiş tanınmış pedaqoq, gözəl insan Sona Hənifə qızı Tağıyeva ilə vidalaşma mərasimi onun 1945-ci ildən rəhbərlik etdiyi 190 nömrəli məktəbdə oldu. Pedaqoji ictimaiyyətin nümayəndələri, görkəmli ziyalılar, elm və sənət adamları ömrü boyu müəllim adını şərəflə daşıyan Sona Tağıyevaya son borclarını vermək üçün axın-axın məktəbə gəlir, mərhumun xatirəsinə sonsuz ehtiramlarını bildirirdilər.

Vida mərasimini təhsli naziri Misir Mərdanov açaraq Sona Tağıyevanın həyatından və pedaqoji fəaliyyətindən danışdı. Bakı Şəhər Baş Təhsil İdarəsinin rəisi, Təhsil İslahatı üzrə Layihənin Əlaqələndirmə Qrupunun rəhbəri Asif Cahangirov, respublika Təhsil Şurasının sədri, professor Əjdər Ağayev, Tələbə Qəbulu üzrə Dövlət Komissiyasının sədri Məleykə Abbaszadə, ombudsman Elmira Süleymanova, Səbail rayon Təhsil Şöbəsinin müdiri Sara Xanlarova, məktəbin məzunları, müəllimlər 59 il direktoru olduğu 190 nömrəli məktəbdə Sona xanımın Azərbaycan maarifinin inkişafı uğrunda xidmətlərindən danışdılar. Mərhumun yüksək insani keyfiyyətləri, uzunmüddətli pedaqoji fəaliyyətinin unudulmaz məqamları bir daha yada salındı.

Sonra mərhumun cənazəsi qəbiristanlığa gətirilərək torpağa tapşırıldı.

SON MƏNZİLƏ

MÜƏLLİFLƏ ƏLAQƏ

Bölmənin digər xəbərləri