SON ON GÜNDƏ 625 MİLYON MANATLIQDAN ÇOX QAÇAQMAL MÜSADİRƏ EDİLMİŞDİR
Ölkəmizin dövlət sərhədinin mühafizəsinin gücləndirilməsi stiqamətində görülən məqsədyönlü tədbirlər müsbət nəticələrini verməkdədir. Dövlət Sərhəd Xidmətindən AZƏRTAC-a bildirmişlər ki, təkcə son 10 gün ərzində dövlət sərhədini və sərhəd rejimini pozmağa cəhd göstərən 30 nəfər saxlanılmış, barələrində müvafiq tədbirlər görülmüşdür. Axtarışda olan 5 nəfər saxlanılaraq, hüquq-mühafizə orqanlarına təhvil verilmişdir.
Noyabrın 15-də Naxçıvan Muxtar Respublikasının Şərur rayonunda DİN-nin əməkdaşları ilə birlikdə keçirilən əməliyyat tədbiri nəticəsində saxlanılmış iki nəfər İran vətəndaşından bir ədəd avtomat silah, 59 patron və gecəgörmə cihazı götürülmüşdür.
Göstərilən müddətdə 625 milyon manatlıqdan çox qaçaqmalın dövlət sərhədindən keçirilməsinin qarşısı alınmışdır. 4,9 ton əlvan metal, 4850 litr benzin, müxtəlif çeşiddə 24348 ədəd pal-paltar, 10763 qutu oyuncaq partlayıcı, 15450 ədəd müxtəlif növ dərman preparatı, 4 ədəd peyk antenasının qəbuledicisi, 7932 ədəd oyun kartı, 84 baş qaramal , 1030 qutu siqaret və s. müsadirə olunmuşdur.
Bölmənin digər xəbərləri
