SOYDAŞIMIZ “QURAN”I TƏRCÜMƏ ETMİŞ, XALQ ARTİSTİ RASİM BALAYEV İSƏ SƏSƏNDİRMİŞDİR
AZƏRTAC xəbər verir ki, müsəlmanların müqəddəs kitabı “Quran” Hacı Əlixan Musayev tərəfindən Azərbaycan dilinə tərcümə olunmuş və diskə yazılmışdır.
Əməkdar incəsənət xadimi, kinorejissor Şeyx Əbdül Mahmudbəyov bildirmişdir ki, o, Hacı Əlixan Musayevlə ötən Həcc ziyrəti zamanı Səudiyyə Ərəbistanında tanış olmuşdur. Həmyerlimiz Mədinə şəhərində İlahiyyat Akademiyasını fərqlənmə diplomu ilə başa vurmuşdur. Ərəb dilinin və ilahiyyat elminin bilicilərindəndir. Söhbət edərkən bildirib ki, “Quran”ı Azərbaycan dilinə tərcümə etmişdir. Eyni zamanda, Peyğəmbəri yaxşı tanıyanların xatirələrinə istinad etməklə ayələrin necə nazil olması, Məhəmməd Peyğəmbərin hədisləri ilə əlaqədar 240 səhifəlik izahat da vermişdir.
Bu söhbətdən sonra müqəddəs kitabın Hacı Əlixan Musayev tərəfindən Azərbaycan dilinə tərcüməsini nəşr etdirmək qərar alınmışdır. Bu iş həyata keçirilmiş, üstəlik də kitab xalq artisti Rasim Balayevin qiraətində diskə yazılmışdır.
Rasim Balayevin sözlərinə görə o, “Quran”ı çox asan və xüsusi əhval-ruhiyyə ilə səsləndirmişdir. Bu işdə tərcüməçinin də rolu böyükdür. Çünki o, asan anlaşılan sözlər və ifadələr seçmişdir.
Qeyd edək ki, “Quran” və disk kommersiya məqsədilə hazırlanmamışdır. Maliyyə vəsaitinin olmaması üzündən az miqdarda buraxılmışdır. Onları əldə etmək istəyənlər Şex Əbdül Mahmudbəyova müraciət edə bilərlər.
Bölmənin digər xəbərləri
