Soyqırımı qurbanlarının xatirəsi silsilə tədbirlərlə anılıb
Bakı, 31 mart, AZƏRTAC
Mehdi Hüseynzadə adına 19 nömrəli orta məktəbdə 31 mart - Azərbaycanlıların Soyqırımı Gününə həsr edilmiş seminar keçirilib.
AZƏRTAC xəbər verir ki, Azərbaycan Dövlət Din Tarixi muzeyinin birgə təşkilatçılığı ilə keçirilən seminarda məktəbin direktoru Akif Əliyev mövzunu qloballaşdıraraq qüdrətli dövlətlərin dünya hegemonluğunu qoruyub saxlamaları üçün terrorizmdən və xırda xalqlardan bir vasitə kimi istifadə etdiklərini vurğulayıb.
Tədbirdə Din Tarixi muzeyinin direktoru Münəvvər Babayeva, məktəbin tarix müəllimi Sona Əsgərova, tarixçi alim Gülçöhrə Rəhimova və başqaları ulu öndər Heydər Əliyevin ikinci dəfə siyasi hakimiyyətə qayıdışından sonra 31 mart hadisələrinə siyasi qiymət verildiyini vurğulayıblar.
Sonda məktəbin şagirdlərinin iştirakı ilə seminar diskussiya şəkilində davam edib, şagirdlərə tariximizdən bəhs edən kitablar hədiyyə olunub.
x x x
N.Nərimanovun ev-muzeyində soyqırımı qurbanlarının xatirəsi “Qan yaddaşımız” adlı tədbirlə anılıb.
İştirakçılar əvvəlcə muzeyinin foyesində soyqırımı hadisələrini əks etdirən fotoşəkillərlə tanış olunublar.
Tədbirdə iştirak edən məktəblilərə bu qanlı cinayət hadisələri haqqında ətraflı məlumat verilib və şagirdlər tariximizin həmin səhifələrini araşdıran tarixçi alimlərimizin tədqiqat əsərləri ilə tanış edilib.
x x x
Türkan qəsəbə Mədəniyyət Mərkəzində keçirilən “Unutsaq unudularıq” adlı tədbir də soyqırımı qurbanlarının xatirəsinə həsr edilib.
Mədəniyyət Mərkəzinin bədii rəhbəri Elnarə Xələfova bu mövzuya həsr edilmiş məruzə ilə çıxış edib. O, tədbir iştirakçılarına 1918-ci ilin mart hadisələri haqqında ətraflı məlumat verib. Bildirilib ki, bu tarixi hadisələr heç vaxt unudulmamalı və hər zaman xatırlanmalıdır.
Tədbirdə mərkəzin metodisti Misir Babayevin və gənc ifaçı Rüstəm Hacıyevin ifasında soyqırımı qurbanların xatirəsinə ithaf edilmiş musiqilər səsləndirilib.
x x x
“Qafqaz Media” İctimai Birliyində keçirilən tədbirdə soyqırımı qurbanlarının xatirəsi bir dəqiqəlik sükutla yad olunub.
Birliyin sədri Azadə Hüseynova Azərbaycan xalqına qarşı yüz illər boyu davam edən soyqırımı və təcavüz siyasətinin məqsədi, mahiyyəti və tarixi kökləri barədə məlumat verib, ermənilərin azərbaycanlılara qarşı zaman-zaman həyata keçirdikləri məkrli planlardan danışıb.
Bakı Dövlət Universitetinin müəllimi, şair Knyaz Aslan, “Zirvə” İnformasiya Mərkəzinin rəhbəri Müşfiq Borçalı və başqaları XX əsrin əvvəllərində xalqımıza qarşı açıq şəkildə genişmiqyaslı qanlı aksiyalar həyata keçirməyə başlayan erməni daşnaklarının 1918-ci ilin martında Bakı, Şamaxı, Quba, Lənkəran, Qarabağ, Naxçıvan, İrəvan və digər bölgələrdə kütləvi qırğınlar törədərək, on minlərlə soydaşımızı qətlə yetirdiklərini bildiriblər.
Xalqımıza qarşı etnik təmizləmə siyasətinin sonrakı dövrlərdə də davam etdirildiyini bildirən natiqlər təcavüzkar ermənilərin apardıqları işğalçılıq müharibəsi nəticəsində torpaqlarımızın 20 faizinin zəbt edildiyini, 20 minədək azərbaycanlının şəhid olduğunu, bir milyondan çox həmvətənimizin doğma torpaqlarımızdan qovulduğunu xatırladıblar.
x x x
Bakı Şəhər Mədəniyyət və Turizm İdarəsinin şəbəkəsinə daxil olan Ə.Əmirov adına Mədəniyyət Sarayında təşkil olunan “dəyirmi masa”da çıxış edənlər də xalqımızın başına gətirilən müsibətlərdən söz açıblar.
Sarayının əməkdaşları Azərbaycan xalqına qarşı törədilmiş soyqırımı haqqında məruzə ilə çıxış ediblər.
Bildirilib ki, ümummilli lider Heydər Əliyevin imzaladığı “Azərbaycanlıların Soyqırımı haqqında” 1998-ci il 26 mart tarixli Fərmanında ilk dəfə rəsmi sürətdə bu hadisələrə siyasi qiymət verilib və azərbaycanlıların ermənilər tərəfindən soyqırımına məruz qalması bəyan edilib.
İştirakçılara son 200 ildə azərbaycanlılara qarşı məqsədli şəkildə həyata keçirilən soyqırımı cinayətlərinin xronologiyası ilə bağlı geniş məlumat verilib. Diqqətə çatdırılıb ki, XIX əsrin 90-cı illərində, 1905-1907, 1915-1920-ci illərdə Gəncədə, Qubada, Lənkəranda, Şamaxıda, Naxçıvanda, Bakıda, Kürdəmirdə azərbaycanlılara, yəhudilərə, ləzgilərə, kürdlərə və digər yerli əhaliyə qarşı erməni terrorçuları tərəfindən kütləvi qırğınlar həyata keçirilib. O illərdən uzun bir müddət keçməsinə baxmayaraq, tarixçilərimiz, arxeoloqlarımız kütləvi insan qırğınlarının canlı şahidinə çevrilən onlarla məzarlıqlar aşkar ediblər. Azərbaycan dövlətinin həyata keçirdiyi tədbirlər nəticəsində Qubada, Şamaxıda, Gəncədə və bir sıra başqa regionlarda memorial kompleksləri yaradılıb, çoxlu əsərlər, məqalələr yazılıb, abidələr qoyulub.
Bölmənin digər xəbərləri
