Stokholmda dünyanın ən hündür taxta binası inşa edilir
Stokholm, 16 oktyabr, Nərgiz Cəfərli, AZƏRTAC
Dünyanın ən hündür taxta binası Stokholmun şimal-qərbindəki Çista bölgəsində inşa ediləcək.
AZƏRTAC xəbər verir ki, 40 mərtəbəli, hündürlüyü 140 metr olan binada iki min iş yeri üçün ofislər yerləşəcək. Binanın ən yuxarı mərtəbəsində restoran və açıq terras, birinci mərtəbədə kafe fəaliyyət göstərəcək.
Binanın tikiləcəyi yer təsadüfən seçilməyib. Bu günə qədər abadlaşdırılmamış Çista İsveçdə artan cinayətlər baxımından yaşamaq üçün təhlükəli yer sayılır. Ölkə üzrə cinayətlərin əhəmiyyətli bir hissəsi məhz bu rayonun payına düşür. Bu layihənin həyata keçirilməsi Çista bölgəsində məskunlaşmanın artırılması və bununla da cinayətkarlıqla mübarizə aparılması məqsədi daşıyır.
İnşaatında İsveçin meşə ağaclarından istifadə olunacaq binanın tikintisinin 2026-cı ilə, ilk məskunlaşmanın isə 2028-ci ilə həyata keçirilməsi planlaşdırılır.
Stokholm şəhər hökumətinin fikrincə, Çista şəhərsalma işinin sürətlə inkişaf etdirilməsi üçün böyük potensiala malikdir. Burada 4000-ə yaxın yaşayış evi, otel, ticarət və idman obyektləri, ofis və uşaq bağçalarının inşa edilməsi nəzərdə tutulur.
Bölmənin digər xəbərləri
