Sudanın lideri: Müstəmləkəçi güclər Afrikada münaqişələri qızışdırır
Bakı, 13 yanvar, AZƏRTAC
Sudan lideri Əbdülfəttah əl-Burhan bəyan edib ki, müstəmləkəçi güclər Afrikada münaqişələri qızışdırır.
AZƏRTAC xarici mediaya istinadla xəbər verir ki, Sudanın Suveren Şurasının rəhbəri Əbdülfəttah əl-Burhan bu bəyanatı paytaxt Bisaudakı Prezident sarayında Qvineya-Bisau Prezidenti Umaro Sissoko Embalo ilə görüşü zamanı deyib.
Əl-Burhan və Embalo iki ölkə arasında əlaqələri və bütün sahələrdə əməkdaşlığı genişləndirmək yollarını müzakirə etmək üçün ikitərəfli görüş keçiriblər. Sudan Suveren Şurasının bəyanatında deyilir ki, Əl-Burhan Sudandakı vəziyyəti Çevik Dəstək Qüvvələrinin (RSF) dövlət və onun qurumlarına qarşı qaldırdığı üsyanla izah edib. O əlavə edib ki, Afrika qitəsində münaqişələri qızışdırmağa çalışan müstəmləkəçi güclər var.
Sudanın rəhbəri qeyd edib ki, Afrika indi oyanış dövrünü yaşayır ki, bu da qitə ölkələrinə onların daxili işlərinə xarici müdaxiləyə müqavimət göstərməyə imkan verir. “Biz həm köhnə, həm də müasir müstəmləkəçiliyə qarşı ayağa qalxan bəzi Afrika xalqlarının səylərini təqdir edirik”, -deyə o vurğulayıb.
Bölmənin digər xəbərləri
