SUMQAYITDA GÖRÜLMÜŞ İŞLƏR AZƏRBAYCAN PREZİDENTİ HEYDƏR ƏLİYEVİN ŞƏHƏRİN QAYĞILARINA DAİMİ DİQQƏTİNİN NƏTİCƏSİDİR
İyulun 12-də Sumqayıtın Üzeyir Hacıbəyov adına mədəniyyət sarayında görkəmli dövlət xadimi, müdrik siyasətçi, Azərbaycan Respublikasının Prezidenti Heydər Əliyevin siyasi fəaliyyətinin 34 illiyinə və onun cari il aprelin 3-də sumqayıtlılar qarşısında proqram nitqində irəli sürdüyü vəzifələrin yerinə yetirilməsinə həsr edilmiş şəhər fəallarının yığıncağı keçirilmişdir. Şəhər İcra hakimiyyətinin başçısı Vaqif Əliyev yığıncaqda çıxış edərək, görülmüş işlərdən konkret faktlar əsasında ətraflı danışdı, qeyd etdi ki, həmin tarixi gündən keçən 100 gün ərzində Sumqayıtın problemləri maksimum operativliklə həll olunmuşdur. Natiq əhalinin işə düzəlməsi problemləri üzərində dayanaraq nəzərə çarpdırdı ki, “Azərboru” SC, “Azəralüminium” SC, yüngül sənaye müəssisələri artıq işləyir, kərpic zavodunun, plastik boru zavodunun və digər müəssisələrin tikintisi yüksək sürətlə gedir. Bütün bunlar yeni iş yerlərinin açılmasına kömək edir. Cari ilin ikinci rübündə işçilərin orta əmək haqqı 215 min manat olmuşdur ki, bu da ötən ilin həmin dövründəkinə nisbətən 10,4 faiz çoxdur. İstehsalın həcmi 13,5 faiz artmışdır. “Azərikimya” Dövlət Şirkətində onun uzunmüddətli inkişafına dair konsepsiyanın hazırlanması işi başa çatmaqdadır. Şəhərin abadlaşdırılması sahəsində də çox iş görülmüşdür. 150 min kvadratmetr sahəyə asfalt döşənmiş, beş iri küçənin asfalt örtüyü tamamilə dəyişdirilmişdir. Baxımsız qalmış üç park abadlaşdırılmış, çoxlu bağ-bağça, bulvar salınmış, fəvvarələr düzəldilmiş, görkəmli yazıçı Cəlil Məmmədquluzadənin büstü qoyulmuşdur. Əhaliyə kommunal, telekommunikasiya və məişət xidmətlərinin keyfiyyəti yüksəlmişdir. Çoxmərtəbəli evlərdə liftlərin təmir edilib işə salınmasına xüsusi diqqət yetirilmişdir – işləməyən 180 liftin 75-i artıq bərpa edilmişdir. Şəhər su kəməri şəbəkəsinin 3-cü xətti işə salınmışdır ki, bu da Sumqayıtın mərkəzi hissəsinin su təchizatını yaxşılaşdırmağa imkan vermişdir. Sonra V.Əliyev enerji və qaz təchizatının yaxşılaşdırılması sahəsində həyata keçirilmiş tədbirlərdən danışaraq qeyd etdi ki, yaxınlarda yaradılan nəqliyyat departamenti bu xidmətin fəaliyyətini köklü surətdə yaxşılaşdırmağa, şəhərin nəqliyyat təsərrüfatında nizam-intizam yaratmağa, mənfi halları aradan qaldırmağa imkan verəcəkdir. Şəhər İcra hakimiyyətinin başçısı vurğuladı ki, səhiyyə və mədəniyyət sahələrində də xeyli iş görülmüşdür. Ötən dövrdə iki iri mədəniyyət sarayı tamamilə təmir edilərək istifadəyə verilmiş, burada müasir avadanlıq quraşdırılmışdır. Sumqayıt Dövlət Musiqili-Dram Teatrı indi ilk tamaşasına hazırlaşır, halbuki onun truppası dağılmaq həddinə gəlib çıxmışdı. Sumqayıtın idman sahəsində uğurları da qeyd olundu. Sumqayıtlılar onlara daimi diqqət və qayğıya görə Prezident Heydər Əliyevə öz dərin minnətdarlığını bildirirlər. Ölkəyə rəhbərlik etdiyi 34 il ərzində dövlət başçısı Sumqayıta 16 dəfə gəlmiş və onların hər biri tarixi səfər olmuşdur. V.Əliyev dedi: Sumqayıtlılar belə bir faktdan qürur duyurlar ki, gənclərin hamılıqla tanınmış lideri, beynəlxalq səviyyəli siyasətçi kimi püxtələşmiş İlham Əliyev Heydər Əliyev siyasi məktəbinin layiqli yetirməsi və davamçısıdır. Yığıncaqda Milli Məclisin Sumqayıtdan seçilmiş deputatları, bələdiyyə nümayəndələri, sahibkarlar, idmançılar və başqaları çıxış edərək, şəhərdə belə qısa müddət ərzində görülmüş işlərdən danışdı, şəhər rəhbərliyini dəstəklədiklərini bildirdilər. Yığıncaqda Azərbaycan Respublikasının Prezidenti Heydər Əliyevə müraciət qəbul edildi.Axşam şəhərin mərkəzi meydanında Azərbaycanın incəsənət ustalarının iştirakı ilə böyük konsert oldu.
Bölmənin digər xəbərləri
