Sumqayıtda güzəştli mənzillər nümayiş olunub
Bakı, 3 avqust, AZƏRTAC
Regionda ilk güzəştli mənzillərin satışına hazırlıq işləri çərçivəsində Mənzil İnşaatı Dövlət Agentliyinin Sumqayıt şəhərində inşa olunmuş binalarında İpoteka və Kredit Zəmanət Fondunun, agent bankların və qiymətləndirici şirkətlərin nümayəndələri ilə görüş təşkil olunub.
Agentliyin İctimaiyyətlə əlaqələr sektorundan AZƏRTAC-a bildirilib ki, tədbirdə 2021-ci ilin avqustun 17-də Sumqayıt şəhərində satışa çıxarılacaq güzəştli mənzillər, istifadə olunan inşaat materialları və təmir növləri haqqında ətraflı məlumat verilib.
Agentliyin nümayəndəsi qeyd edib ki, Sumqayıt şəhəri, Zəminə Həsənova küçəsində inşa olunmuş layihə 2 ədəd doqquzmərtəbəli 2 bloklu yaşayış binasından ibarətdir. Bu binalarda ümumilikdə 144 mənzil var. Ərazidə yaşayış binalarının tikintisi ilə yanaşı yaşıllaşdırma və abadlıq işləri həyata keçirilib, həmçinin uşaqlar üçün basketbol meydançası istifadəyə verilib.
2021-ci il avqustun 17-də Sumqayıt şəhərində güzəştli mənzillərin satışına başlanılacaq və avqustun 24-dək davam edəcək.
“Azərbaycan Respublikasının Mənzil İnşaatı Dövlət Agentliyinin sərəncamında olan mənzilləri vətəndaşların güzəştlə əldə etməsi Qaydası”na uyğun olaraq, gözləmə qaydasında mənzillərin seçimi 2021-ci il avqustun 20-də başlayacaq və avqustun 24-dək davam edəcək.
Mənzillərin əldə edilməsi “Elektron hökumət” portalı üzərində (www.e-gov.az) “Güzəştli mənzil” sistemi vasitəsilə elektron qaydada həyata keçirilir.
Bütün mənzillər tam təmirli, mətbəx mebeli, kombi isitmə sistemi (kombi cihazı daxil olmaqla), su, qaz və elektrik sayğacları ilə təmin edilmiş vəziyyətdə təklif olunur.
Məlumat verilib ki, Sumqayıt şəhərində güzəştli mənzillər haqqında məlumatların ətraflı təqdim olunduğu “sumqayit.mida.gov.az” internet səhifəsi və onun mobil versiyası istifadəyə verilib. İnternet səhifə hər kəs üçün Sumqayıt şəhərində güzəştli mənzillər barədə ətraflı məlumat əldə etmək imkanını təmin edir.
Tədbir iştirakçıları sözügedən mənzillərdə gələcək sakinlərin rahat və sağlam yaşayışı üçün bütün zəruri şəraitin yaradıldığını vurğulayıblar.
Mənzilləri güzəştli ipoteka krediti hesabına əldə etmək istəyən “Güzəştli mənzil” sistemində elektron kabineti olan vətəndaşlar İpoteka və Kredit Zəmanət Fondunun müvəkkil bankları sırasına daxil olan və “MİDA” MMC ilə əməkdaşlıq müqaviləsi imzalamış “Kapital Bank” ASC, “Azər-Türk Bank” ASC, “Bank VTB (Azərbaycan)” ASC, “Azərbaycan Beynəlxalq Bankı” ASC və “TuranBank” ASC-nin təqdim etdiyi güzəştli ipoteka kreditindən yararlana bilərlər.
Vətəndaşların rahatlığını təmin etmək məqsədilə, bu kredit təşkilatlarının müvafiq filiallarında güzəştli ipoteka kreditinin əldə edilməsi ilə bağlı sualların cavablandırılması işi həyata keçirilir.
Güzəştlə mənzil əldə etmək hüququna malik vətəndaşlar bu siyahıda göstərilən ünvanlardan birinə yaxınlaşaraq və ya əlaqə nömrələrinə zəng edərək mövzu ilə bağlı suallara cavab tapa bilərlər.
Bölmənin digər xəbərləri
