Şuşa Bəyannaməsi ilə bütün Türk dünyasını birləşdirəcək Zəngəzur dəhlizinin açılması məsələsi qətiləşdi
Bakı, 19 iyun, AZƏRTAC
Qırx dörd günlük Vətən müharibəsinin gedişində qardaş Türkiyə həmişə Azərbaycanın yanında oldu, Qarabağ məsələsini öz problemi hesab etdi. Təcavüzkar Ermənistanın havadarlarının təzyiqləri ilə qarşılaşan Türkiyə Prezidenti Rəcəb Tayyib Ərdoğan hər zaman qətiyyətlə ölkəsinin ədalətin, haqq işinin tərəfində olduğunun və Azərbaycanı dəstəkləməkdə davam edəcəklərini vurğulayırdı. Vətən müharibəsi dövründə Türkiyənin bütün dövlət strukturları Azərbaycanın Qələbəsi üçün bütün sahələrdə böyük əzmkarlıq göstərdilər. Beynəlxalq təzyiqlər olsa da, Türkiyə qardaşlıq dəstəyi mövqeyindən geri çəkilmədi. Bu gün Türkiyə bölgədə sülhün qorunması prosesində də yaxından iştirak edir.
Bu fikirləri AZƏRTAC-a açıqlamasında Milli Məclisin deputatı Anar Məmmədov bildirib.
Deputat qeyd edib ki, iyunun 16-da Türkiyə Prezidenti Milli Məclisdəki tarixi çıxışı ilə dünyanın diqqətini bir daha Azərbaycana yönəltdi. Prezident Ərdoğan parlamentdə bir çox mühüm məsələlərə toxundu və birmənalı şəkildə dünyaya çatdırdı ki, Türkiyə hər zaman Azərbaycanın yanında olmaqda davam edəcək. O, çıxışında Cənubi Qafqazdakı sülh və əmin-amanlıqdan yalnız Azərbaycan deyil, Ermənistan da daxil olmaqla, bütün bölgə ölkələrinin, hətta bütün dünyanın qazanclı çıxacağını vurğuladı. Prezident Rəcəb Tayyib Ərdoğan, həmçinin əsas məsələ - Rusiya, Türkiyə, Azərbaycan, İran, Ermənistan və Gürcüstan platformasının yaradılmasının region üçün vacibliyini vurğuladı. Bildirdi ki, yeni platforma bütün bölgənin inkişafına xidmət edəcək. Çünki davamlı sülhə gedən yol bölgədəki bütün xalqların və dövlətlərin qarşılıqlı etimad və əməkdaşlığından keçir.
Türkiyə Prezidentinin Zəngəzur dəhlizinin açılmasına böyük önəm verdiyini diqqətə çatdıran A.Məmmədov deyib: “Prezident Rəcəb Tayyib Ərdoğan çıxışında vurğuladı ki, kommunikasiyaların bərpası və əməkdaşlığın formalaşması üçün əsas layihələrdən biri də məhz Zəngəzur dəhlizinin açılmasıdır. Belə ki, Türkiyə ilə Azərbaycan arasındakı imzalanmış Şuşa Bəyannaməsi ilə təkcə iki qardaş ölkəni deyil, bütün Türk dünyasını, eləcə də Şərqlə Qərbi birləşdirəcək Zəngəzur dəhlizinin açılması məsələsi qətiləşdi və bu proses sürətlənəcək. Müttəfiqlik haqqında imzalanmış Bəyannamədə bu məsələnin əks olunması böyük məna daşıyır. Beləliklə, daha bir kommunikasiya xətti türk dünyası coğrafiyasında, eləcə də Asiya ilə Avropa arasında əlaqələrin daha sürətli və asanlaşmasına şərait yaradacaq. İntellektual nəqliyyat sistemləri texnologiyalarından istifadə etməklə beynəlxalq nəqliyyat dəhlizlərinin Azərbaycan-Türkiyə hissələrində tranzit-nəqliyyat potensialının inkişaf etdirilməsi də sənəddə öz əksini tapıb. Yəni, Azərbaycan və Türkiyəni birləşdirən Zəngəzur dəhlizinin açılması regionda nəqliyyat-kommunikasiya əlaqələrinin daha da şaxələnməsini şərtləndirəcək. Bununla da Azərbaycanla Türkiyə birləşəcək. Prezident İlham Əliyev mətbuata bəyanatında vurğuladı ki, Azərbaycanla Türkiyənin Zəngəzur dəhlizi vasitəsilə birləşməsi İkinci Qarabağ müharibəsindən sonra yaranmış yeni geosiyasi vəziyyətin nəticəsidir”.
Deputat bildirib ki, işğaldan azad edildikdən sonra Qarabağa səfər edən ilk xarici dövlət başçısı Türkiyə Prezidenti oldu. Azərbaycan və Türkiyənin növbəti mərhələdə siyasi, iqtisadi və hərbi sektorda əməkdaşlığına dair Bəyannamə Bakıda deyil, məhz Qarabağda imzalandı. Bununla da bütün dünyaya nümunə olan və daim güclənən Azərbaycan və Türkiyə münasibətləri birliyimizin, həmrəyliyimizin rəmzi olaraq Qarabağda yeni və ciddi proseslərə hazırlaşdığını bəyan etdi.
Bölmənin digər xəbərləri
