Şuşa Qlobal Media Forumu beynəlxalq nüfuzunu möhkəmləndirir ŞƏRH
Bakı, 15 iyul, AZƏRTAC
Ənənə halını alan Şuşa Qlobal Media Forumu qısa müddətdə dünyanın müxtəlif ölkələrindən media rəhbərlərini, jurnalistləri, ekspertləri, dövlət rəsmilərini və beynəlxalq təşkilatların nümayəndələrini bir araya gətirən nüfuzlu beynəlxalq platforma kimi diqqət mərkəzindədir. Forumun hər il seçilən mövzuları aktual məsələləri əhatə etməklə yanaşı, müasir medianın inkişaf istiqamətlərini və qarşısında duran əsas çağırışları özündə ehtiva edir. Bu il IV Şuşa Qlobal Media Forumu “Sülhün təşviqində medianın missiyası: Həqiqətin bərpası və etimadın yenidən qurulması” mövzusuna həsr olunub. Forumda 53 ölkədən 160 qonaq, o cümlədən 30 xəbər agentliyinin nümayəndəsi, 60-dan artıq media qurumu, bu sahədə fəaliyyət göstərən 10 beynəlxalq təşkilat və təsisat iştirak edib. Son dörd ildə forum 81 ölkədən 600-ə yaxın media nümayəndəsini bir araya gətirib. Bu statistik göstərici tədbirin əhəmiyyətini və gündəmə gətirdiyi məsələlərin aktuallığını bir daha təsdiqləyir. Şuşanın bu nüfuzlu tədbirə ev sahibliyi etməsi mühüm məqamların təqdimatıdır.
Prezident İlham Əliyev IV Şuşa Qlobal Media Forumunun açılış mərasimində bir daha tədbirin keçirilməsini şərtləndirən amillərə diqqət yönəltdi. Qlobal informasiya məkanında etimadın möhkəmləndirilməsi, beynəlxalq media əməkdaşlığının inkişafı baxımından mühüm platforma kimi çıxış edən IV Şuşa Qlobal Media Forumu Azərbaycanın beynəlxalq münasibətlər sistemində artan rolunu, əməkdaşlıq məkanı kimi möhkəmlənən mövqeyini, yeni dünya nizamının formalaşdığı hazırkı mərhələdə hər bir məsələ ilə bağlı ölkəmizin yanaşmasına nə qədər böyük önəm verildiyini nümayiş etdirir. Ədalətə və beynəlxalq hüquqa söykənən müstəqil siyasətimizin Azərbaycana qazandırdığı uğurlar öz davamlılığı ilə diqqət çəkir.
Bu fikirləri AZƏRTAC-a açıqlamasında Milli Məclisin deputatı Malik Həsənov söyləyib. Deputat qeyd edib ki, azad Şuşa media sahəsində də əməkdaşlığın mühüm mərkəzlərindən biri olduğunu təsdiqləyir: “Dövlətimizin başçısı IV Şuşa Qlobal Media Forumunun açılış mərasimində tədbirin keçirilmə məqsədini açıqladı və vurğuladı ki, burada – Azərbaycanda, Qarabağda, Şuşada belə mötəbər auditoriyanı qəbul etmək böyük şərəfdir. Forumun ideyası maraq doğuran məsələləri, qarşılıqlı narahatlıq doğuran sualları müzakirə etmək, həmçinin Qarabağ və Şuşa ilə tanış olmaq məqsədilə dünyanın müxtəlif guşələrindən gələn media nümayəndələri üçün müvafiq mühit yaratmaqdan ibarətdir”.
Malik Həsənov vurğulayıb ki, ənənəvi olaraq keçirilən Şuşa Qlobal Media Forumunun əhəmiyyətini göstərən məqamlardan biri Prezident İlham Əliyevin yerli və xarici media nümayəndələrinin suallarını cavablandırması, regionda baş verən siyasi proseslər, Azərbaycanın xarici siyasəti, iqtisadi inkişafı, işğaldan azad edilmiş ərazilərdə aparılan bərpa və yenidənqurma işləri, regional təhlükəsizlik, enerji siyasəti və digər aktual məsələlərlə bağlı geniş məlumat verməsidir: “Şuşa Qlobal Media Forumunun sual-cavab formatında təşkili iştirakçılar tərəfindən yüksək dəyərləndirilir. Bu format, eyni zamanda, Azərbaycanla bağlı obyektiv informasiyanın beynəlxalq auditoriyaya çatdırılmasına, ölkənin mövqeyinin daha geniş şəkildə təqdim olunmasına xidmət edir. Forum çərçivəsində səsləndirilən çağırışlar dünyanın aparıcı media qurumlarında geniş işıqlandırılır, beynəlxalq ekspert dairələrində müzakirə olunur və qlobal informasiya məkanında böyük maraq doğurur”.
Deputat qeyd edib ki, forumda müzakirələr Azərbaycanın bütün dövrlərin çağırışlarını yüksək səviyyədə yerinə yetirdiyini, hazırkı mərhələdə sülh təcrübəsi ilə diqqətdə olduğunu və etimad quruculuğunu prioritet hesab etdiyini nümayiş etdirdi. Hər bir forum uğurlu nəticələri ilə tarixə yazılır. Regionda və dünya siyasətində baş verən dəyişikliklər, dövrün yeni hədəfləri və çağırışları forumun əhəmiyyətini daha da artırır. Bir forumdan növbəti foruma qədər baş verən yeniliklər və əldə olunan uğurlar müzakirəyə çıxarılacaq məsələlərin müəyyənləşdirilməsində mühüm rol oynayır. Şuşa Qlobal Media Forumu media gündəliyinin müzakirə olunduğu aparıcı beynəlxalq platformalardan biri kimi mövqeyini ildən-ilə daha da möhkəmləndirir.
Bölmənin digər xəbərləri
