Süveyş kanalının girişində 321 gəmi keçid növbəsi gözləyir
Qahirə, 27 mart, AZƏRTAC
Nəhəng yük gəmisinin saya oturması nəticəsində bağlanmış Süveyş kanalının girişində 321 gəmi keçid növbəsi gözləyir.
AZƏRTAC xəbər verir ki, bu barədə Misirin Süveyş Kanalı İdarəsinin rəhbəri Osama Rabiyə keçirdiyi mətbuat konfransında məlumat verib.
Jurnalistlərə bildirilib ki, Panama bayrağı altında üzən və 400 metr uzunluğunda olan “Ever Given” yük gəmisinin altından və ətrafından 90 min ton ballast suyu təmizlənib. Misir rəsmisi əlavə edib ki, insidentin əsas səbəbi bir gün əvvəl həmin ərazidə baş verən güclü qum fırtınası nəticəsində kanalın dayazlaşması olub.
Misir Prezidentinin tapşırığına əsasən kanalın açılması işlərinə nəzarət edən Baş nazir Mustafa Mədbuli yardım təklif edən ölkələrə təşəkkür edərək bildirib ki, təmizləmə işləri uğurla davam etdirilir. Burada artıq 14 yedək gəmisi “Ever Given”in tezliklə yola salınması üçün əsas işləri görür. Bununla belə, Misir rəsmisi Süveyş kanalının açılacağı dəqiq tarixi söyləməyib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
