Tbilisidə Azərbaycan Xalq Cümhuriyyətinin 100 illiyi münasibətilə rəsmi qəbul keçirilib
Tbilisi, 29 may, AZƏRTAC
Azərbaycanın Gürcüstandakı səfirliyi paytaxt Tbilisidəki “Gənclər sarayı”nda Azərbaycan Xalq Cümhuriyyətinin (AXC) 100 illiyi münasibətilə rəsmi qəbul təşkil edib.
AZƏRTAC xəbər verir ki, 1918-ci il mayın 28-də AXC-nin elan olnduğu binada təşkil olunmuş tədbirdə səfirliyin və konsulluğun əməkdaşları, Gürcüstanın Baş naziri Giorgi Kvirikaşvili, xarici işlər naziri Mixeil Canelidze, müdafiə naziri Levan İzoriya, Gürcüstan parlamentinin deputatları Ruslan Hacıyev, Mahir Dərziyev, Savalan Mirzəyev, Marneuli rayon icra başçısı Temur Abazov, Azərbaycan Mili Məclisinin deputatı Musa Quliyev, SOCAR-ın Gürcüstan nümayəndəliyinin rəhbəri Mahir Məmmədov və digər rəsmi şəxslər, diplomatik korpusun nümayəndələri, ziyalılar iştirak ediblər.
Mərasim Azərbaycanın və Gürcüstanın dövlət himnlərinin səsləndirilməsi ilə başlayıb.
Tədbirdə çıxış edən səfir Dursun Həsənov Azərbaycan xalqının 100 il bundan əvvəl, 1918-ci ilin 28 may tarixində öz müstəqilliyini elan etdiyini və türk-islam Şərqinin ilk respublikası olan Azərbaycan Xalq Cümhuriyyətini qurduğunu bildirib.
O deyib ki, Azərbaycan Xalq Cümhuriyyəti mövcud olduğu qısa müddət ərzində demokratik cəmiyyətin formalaşması istiqamətində mühüm addımlar atıb, bütün vətəndaşların hüquq və azadlıqlarının bərabərliyini təmin edib. Avropanın bir çox dövlətlərində qadınların seçmək və seçilmək hüquqlarının olmadığı bir dövrdə, Azərbaycan Demokratik Respublikası 1918-ci ildə qadınlara bu hüququ verib. AXC-nin Qızıl Ordu tərəfindən işğalından sonrakı taleyi barədə məlumat verən Dursun Həsənov uzun illər SSRİ-nin tərkibində qalsa da Azərbaycan xalqının dövlətçilik hisslərini heç vaxt itirmədiyini və 1991-ci ildə Sovet İttifaqının dağılması ilə yenidən müstəqil dövlət qurmağa nail olduğunu bildirib.
1990-cı illərin əvvəllərində yenicə müstəqilliyini bərpa etmiş Azərbaycanın çox çətin dövrlər yaşadığını qeyd edən səfir ölkənin daxildən və xaricdən bir çox təzyiqlərlə üzləşdiyini, Azərbaycanın 20 faiz torpaqlarının Ermənistan silahlı qüvvələri tərəfindən işğal olunduğunu, 1993-cü ildə xalqın tələbi ilə ümummilli lider Heydər Əliyevin hakimiyyətə gəlməsi ilə ölkədə ciddi dəyişikliklərin həyata keçirilməsinə başlandığını bildirib. Məhz Ulu Öndərin müdrik siyasəti ilə qısa zaman ərzində dövlətin əsaslarının gücləndiyini vurğulayan diplomat işğalçı Ermənistan tərəfi ilə atəşkəslə bağlı razılaşmanın əldə olunduğunu, Ümummilli Lider tərəfindən milli enerji strategiyasının işlənildiyini diqqətə çatdırıb.
Son 15 il ərzində Azərbaycan iqtisadiyyatının sürətlə inkişaf etdiyini söyləyən səfir ölkəmizin regionda turizm məkanına çevrildiyini, dünya ölkələri, o cümlədən ərəb və müsəlman dünyası ilə münasibətlərin sürətlə inkişaf etdirdiyini, beynəlxalq əhəmiyyətli tədbirlərə ev sahibliyi etdiyini vurğulayıb.
Sonra çıxış edən G.Kvirikaşvili Azərbaycan xalqını Respublika Günü və ilk respublikanın yaranmasının 100 illiyi münasibətilə təbrik edib. Baş nazir iki gün öncə Gürcüstanda Müstəqillik günü və ilk respublikanın yaranmasının 100 illiyinin qeyd olunduğunu xatırladıb. Bildirib ki, bu 100 ildə ölkələrimiz çox problemlərlə üzləşib, maneələrdən keçib. Xalqlarımızın dostluq və mehriban qonşuluq əlaqələrinin çox qədim tarixi var. Bu gün biz birgə səy göstərərək sülh və davamlı sabitliyi olan region qururuq. “Sülh və sabit region bizim hamımızın ən başlıca məqsədimizdir”,- deyə Kvirikaşvili vurğulayıb.
Baş nazir Gürcüstanın və Azərbaycanın birgə həyata keçirdiyi strateji layihələrin əhəmiyyətindən danışaraq onların regionda sülh və əmin-amanlığa xidmət etdiyini qeyd edib. Baş nazir Azərbaycan-Gürcüstan dostluğunun bir nümunə olduğunu vurğulayıb.
Sonra simvolik olaraq Azərbaycan Xalq Cümhuriyyətinin müstəqillik aktı oxunub.
Tədbir konsert proqramı ilə davam etdirilib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
