Tbilisinin dəmir yolu vağzalının yaxınlığındakı bazarda yanğın baş verib
Tbilisi, 2 oktyabr, AZƏRTAC
Tbilisidə dəmir yolu vağzalının yaxınlığındakı bazarda yanğın baş verib.
AZƏRTAC xəbər verir ki, yanğın Tsabadze küçəsindəki “Terqi” bazarının ərazisində qeydə alınıb. Yanğının baş verdiyi ərazidə partlayış səsləri də eşidilir.
Alov 200 kvadratmetr sahəni əhatə edib. Yanğın zamanı xəsarət alan olmayıb.
Gürcüstanın Fövqəladə Halların İdarə Olunması Xidmətinin yaydığı məlumatda deyilir ki, yanğın oyuncaq mağazasında baş verib. Hadisə yerinə 15 briqada, 80 yanğınsöndürən və xilasedici cəlb olunub.
Yanğının daha geniş əraziyə yayılmasının qarşısı alınıb.
Xidmətdən bildirilib ki, “Terqi” bazarının ikinci mərtəbəsində pirotexniki vasitələr və parfümeriya vasitələri də satılır. Partlayışa da həmin vasitələr səbəb olub.
Faktla bağlı Gürcüstan Daxili İşlər Nazirliyində cinayət işi başlanıb, araşdırma aparılır.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
