TDƏŞ ilə ICSS arasında əməkdaşlıq memorandumu imzalanıb
İstanbul, 12 noyabr, AZƏRTAC
İstanbul şəhərində Türkdilli Dövlətlərin Əməkdaşlıq Şurası (TDƏŞ) ilə Beynəlxalq İdman Təhlükəsizlik Mərkəzi (ICSS) arasında əməkdaşlıq memorandumu imzalanıb. Memorandumu TDƏŞ-in baş katibi Ramil Həsənov və İCSS-nin prezidenti Məhəmməd Hanzab imzalayıblar.
İmzalanma mərasimində İstanbulda akkreditə olunmuş baş konsullar, diplomatik korpusun digər təmsilçiləri və KİV nümayəndələri iştirak ediblər.
Sənədin əhəmiyyəti barədə açıqlama verən Ramil Həsənov və Məhəmməd Hanzab qeyd ediblər ki, bu əməkdaşlıq beynəlxalq idman şəffaflığının qorunması, o cümlədən TDƏŞ-ə üzv ölkələrdə gənclərin intellektinin yüksəldilməsi, dünya idman ictimaiyyətinə yeni layihələrin təqdim olunması işinə böyük töhfə verəcək. Vurğulanıb ki, bu anlaşma “Bakı-2015” birinci Avropa Oyunları da daxil olmaqla, türkdilli ölkələrdə idman sahəsində qazanılan nailiyyətlər və perspektivlər əsasında meydana gəlib.
Xatırladaq ki, baş ofisi Qətər Dövlətinin paytaxtı Dohada yerləşən ICSS-nin Nyu-York, Cenevrə, London və Paris şəhərlərində də ofisləri fəaliyyət göstərir.
Sabir Şahtaxtı
AZƏRTAC-ın xüsusi müxbiri
İstanbul
Bölmənin digər xəbərləri
