Tədbir Quba rayonu ictimaiyyətinin yaddaşında dərin iz buraxmışdır
Bakı, 30 mart (AZƏRTAC). Azərbaycan Yazıçılar Birliyinin (AYB) və Quba Rayon İcra Hakimiyyətinin birgə təşkilatçılığı ilə Quba rayonunun İkinci Nügədi kəndindəki I nömrəli orta məktəbdə 31 mart - Azərbaycanlıların Soyqırımı Gününə həsr olunmuş tədbir keçirilmişdir.
AZƏRTAC xəbər verir ki, məktəbin direktoru Səbuhi Hacıxanlı tədbirin məqsədindən danışmışdır.
Azərbaycan Yazıçılar Birliyinin nümayəndələri, tanınmış tənqidçi, filologiya elmləri doktoru Vaqif Yusifli, AYB-in mətbuat katibi Ədalət Əsgəroğlu və Birliyin Quba bölməsinin sədri, şair Ramiz Qusarçaylı çıxış edərək ermənilərin zaman-zaman xalqımıza qarşı həyata keçirdikləri soyqırımı aktlarından, o cümlədən 1918-ci ilin qanlı mart qırğınından söhbət açmışlar.
Məktəbin şagirdləri Ədalət Əsgəroğlunun Xocalı faciəsinə həsr olunmuş “Xocam Xocalı” poeması əsasında hazırladıqları ədəbi-bədii kompozisiyanı nümayiş etdirmişlər.
Tədbir şagird və müəllimlərin, habelə rayon ictimaiyyətinin yaddaşında dərin iz buraxmışdır.
Bölmənin digər xəbərləri
