TƏLƏBƏ QƏBULU ÜZRƏ DÖVLƏT KOMİSSİYASININ MƏLUMATI
QƏBUL İMTAHANLARININ PROQRAMLARI ÇAPDAN ÇIXMIŞDIR
Tələbə Qəbulu üzrə Dövlət Komissiyasının /TQDK/ mətbu orqanı olan “Abituriyent” jurnalının 2002-ci il 1-ci sayı çapdan çıxmışdır. Jurnal Tələbə Qəbulu üzrə Dövlət Komissiyasının sədri Məleykə Abbaszadənin giriş məqaləsi ilə başlayır. Məqalədə deyilir:
- “Müstəqil dövlət quruculuğu mərhələsində ölkəmizdə əldə olunan ən böyük nailiyyətlərdən biri ali və orta ixtisas təhsili məktəblərinə qəbulda yaradılan ciddi qayda-qanun, obyektivlik, ədalətlilik, aşkarlıq və şəffaflıqdır. Ölkəmizdə milli gerçəkliyə və milli dəyərlərə söykənən, müasir elmi nailiyyətlər və texnologiyalardan istifadə edən bütöv bir sistem - biliyin qiymətləndirilməsinin yeni sistemi qurulub. Bu illərdə həmvətənlərimizin böyük bir nəsli bu sistemdən keçərək tələbə vəsiqəsi alıb, təhsillərini başa vuraraq elm, texnika, idarəetmə, hüquq-mühafizə sistemi, iqtisadiyyat, təhsil, səhiyyə, mədəniyyət və digər sahələrdə əmək fəaliyyətinə başlayıb. Ötən dövr ərzində sistem nə qədər möhkəmlənibsə, onun effektivliyi də bir o qədər artıb. Bu nüfuz ölkə əhalisinin ən müxtəlif təbəqələrinin mövcud sistemin obyektivliyinə, ədalətliliyinə möhkəm inamında təsdiqini tapıb. Bizim nailiyyətlərimizin ən böyüyü olan bu inam eyni zamanda gənclərimizin təhsilində qazandığı müvəffəqiyyətlərin ən mühüm amilidir. Mövcud sistemin ali məktəbə öz biliyi ilə qəbul olmağa tam real imkanlar təmin etdiyini görmək və inanmaq gənclər arasında oxumağa, öz bilik səviyyəsini artırmağa dərin maraq və tələbat doğurubdur”.
Jurnalın bu sayından etibarən TQDK abituriyentlər üçün silsilə elmi-metodiki materialların nəşrinə başlayır. Bu nömrədə 4 fənn üzrə - Azərbaycan dili və ədəbiyyat, riyaziyyat, kimya və coğrafiya fənləri üzrə qəbul proqramları dərc edilir. Bu proqramlar Dövlət Komissiyasında fəaliyyət göstərən fənlər üzrə elmi-metodiki seminarlarda ümumtəhsil məktəblərinin fənn proqramları və yeni dərsliklər əsasında tərtib edilib. Müəlliflər proqramları təkmilləşdirmək məqsədi ilə redaktə xarakterli dəqiqləşdirmələr aparıb, dərsliklərdəki yenilik və dəyişiklikləri nəzərə alaraq əlavələr və düzəlişlər ediblər. Digər fənlər üzrə qəbul proqramları jurnalın növbəti sayında dərc olunacaqdır.
Ötən il çap olunub oxucuların istifadəsinə verilən ayrı-ayrı fənlər üzrə testlər bankı abituriyentlərin qəbul imtahanlarına səmərəli və məqsədyönlü hazırlaşmasında, müəllimlərin onlardan təlim prosesində metodiki vəsait kimi istifadə etməsində əhəmiyyətli rol oynayıb. Onlar indi də belə bir vacib funksiyanı yerinə yetirməkdədir. Təbii ki, testlər bankındakı suallar mürəkkəblik dərəcəsinə görə eyni deyil. Onların içərisində abituriyentlərin çətinlik çəkdikləri testlər də var. Oxuculardan bir çoxu Dövlət Komissiyasına müraciət edərək, belə testlərin izahlı cavablarının verilməsini xahiş edirlər. Onların müraciətlərini nəzərə alaraq “Abituriyent”in bu sayından etibarən ayrı-ayrı fənlər üzrə bəzi çətin testlərin mütəxəssislər tərəfindən hazırlanmış izahlı cavabları dərc olunacaqdır.
Peşə-ixtisas seçimində Gənclərin istiqamətləndirilməsində onların bütövlükdə ali və orta ixtisas təhsili məktəblərimiz və bu təhsil ocaqlarındakı ixtisaslar şəbəkəsi haqqında dolğun təsəvvürə malik olmalarının mühüm əhəmiyyəti vardır. Bunu nəzərə alaraq, bu ildən ali məktəblərimizin ixtisaslar şəbəkəsi haqqında silsilə materiallar dərc etmək qərara alınmışdır. Jurnalın bu sayında Bakı Dövlət Universiteti və Azərbaycan Dövlət Neft Akademiyasının bakalavr pilləsində mütəxəssis hazırlığının mahiyyəti, onlara olan tələbat haqqında materiallar dərc edilir. Həmin materiallardan bəlli olur ki, BDU-nun ötən il I qrupda olan “Ətraf mühitin mühafizəsi” ixtisası universitetin müraciəti nəzərə alınaraq II ixtisas qrupuna; ADNA-nın ötən il II qrupda olan “İnzibati idarəetmə” istiqamətinə daxil olan “Gömrük ekspertizası” ixtisası akademiyanın müraciəti nəzərə alınaraq I qrupun RK altqrupuna keçirilmişdir. Jurnalın növbəti saylarında digər ali məktəblərin ixtisasları haqqında da müvafiq yazılar dərc ediləcəkdir.
Jurnalın bu sayında abituriyentlər yeni rubrikalarla da tanış olacaqlar. “Abituriyent”in maraq və məntiqi”, “Dünya bir pəncərədir...” adlanan bu rubrikalarda materiallar gənclərin dünya görüşünün, erudisiyasının, məntiqi təfəkkürünün inkişafına təsir göstərmək məqsədi daşıyır. Oxucular “Soruşun - cavab verək” rubrikasında onları maraqlandıran bəzi suallara cavab tapa biləcəklər.
Bölmənin digər xəbərləri
