TƏLƏBƏLƏR AZƏRBAYCAN ƏDALƏTLİ OYUNLAR KOMİSSİYASININ FƏALİYYƏTİ İLƏ TANIŞ OLMUŞLAR
AZƏRTAC xəbər verir ki, mayın 22-də Azərbaycan Dövlət Bədən Tərbiyəsi və İdman Akademiyasında (ADBTİA) “Ədalətli oyun” (Fair play) prinsiplərinin təbliğinə həsr olunmuş yığıncaq keçirilmişdir. Tədbirdə Azərbaycan Ədalətli Oyunlar Komissiyasınn (AƏOK) sədri Xəzər İsayev ADBTİA-nın tələbələrinə rəhbərlik etdiyi qurumun tarixi barədə məlumat vermişdir. 1997-ci ildə yaradılan AƏOK-un məqsədi idmanla məşğul olmaq üçün hamıya bərabər şərait yaratmaq, hakim ədalətsizliyinin qarşısını almaq, yarış qaydalarını pozanları cəzalandırmaqdan ibarətdir.
Xəzər İsayev idmançılarımızın beynəlxalq miqyaslı yarışlarda tez-tez ədalətsizliklərlə rastlaşdıqlarını qeyd etmişdir.
Bakı Gənclər və İdman Baş İdarəsinin rəisi Məmmədhüseyn Dadaşov, AƏOK-un məsul katibi Səlhət Abbasova, komissiyanın üzvü Cəmaləddin Rəhmanov, ADBTİA-nın elmi işlər üzrə prorektoru Nazim Məcidov, dosent Eldar Acalov ölkədə idmana göstərilən diqqət və qayğının fonunda Azərbaycan idmançılarının ədalətli oyun prinsiplərinə riayət etməsinin əhəmiyyətini qeyd etmişlər. Vurğulanmışdır ki, yarışların təmiz rəqabət şəraitində keçirilməsinə nail olmaq, dopinqə aludəçiliyin qarşısını almaq üçün ölkədə fəaliyyət göstərən bütün federasiyaların birgə əməkdaşlığı vacibdir.
Ədalətli oyun prinsiplərinə riayət edən ən yaxşı idmançılar, məşqçilər, hakimlər xüsusi mükafatlarla təltif olunacaqlar.
Bölmənin digər xəbərləri
