Tərtərdə şəhid Məftun Əhmədzadənin adını daşıyan küçədə barelyefi quraşdırılıb
Tərtər, 14 sentyabr, AZƏRTAC
Tərtər şəhərində şəhid Məftun Əlizadənin adını daşıyan küçədə abadlıq işləri aparılıb. Kommunikasiya xətləri səliqəyə salınıb, asfalt döşənib, küçənin girişində şəhidin barelyefi quraşdırılıb.
AZƏRTAC-ın bölgə müxbiri xəbər verir ki, Tərtər Rayon İcra Hakimiyyətinin başçısı Müstəqim Məmmədov, Milli Məclisin deputatı Sahib Alıyev, YAP rayon təşkilatının və rayon Ağsaqqallar Şurasının sədrləri, şəhid Məftun Əhmədzadənin ailə üzvləri, şəhid ailələri, qazilər və veteranlar küçədə olublar. Rayon icra hakimiyyətinin başçısı Müstəqim Məmmədov bildirib ki, torpaqlarımızın ərazi bütövlüyü uğrunda canlarını qurban vermiş şəhidlərimiz bizim üçün əzizdir, onların xatirəsi əbədiləşdirilir, adlarına küçələr, məktəblər, sinif otaqları verilir, bulaqlar tikilir. Tərtər şəhərində 32 küçəyə şəhid adı verilib və 11 küçənin girişində onların barelyefi qoyulub.
Məlumat verilib ki, Azərbaycan Silahlı Qüvvələrinin müddətdən artıq həqiqi hərbi xidmət qulluqçusu Məftun Əhmədzadə 2022-ci il sentyabrın 13-də Ermənistan silahlı qüvvələrinin Azərbaycan-Ermənistan dövlət sərhədində törətdikləri təxribatın qarşısının alınması zamanı şəhid olub. Doğulduğu Tərtər rayonunun Evoğlu kəndində dəfn edilib. Azərbaycan Respublikasının ərazi bütövlüyünün bərpa edilməsi uğrunda gedən döyüş əməliyyatlarında iştirak edərək igidlik və mərdlik göstərmiş, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirərək şəhid olmuş Məftun Əhmədzadə Prezident İlham Əliyevin Sərəncamına əsasən ölümündən sonra 3-cü dərəcəli "Vətənə xidmətə görə" ordeni və "Vətən uğrunda" medalı ilə təltif edilib.
Milli Məclisin deputatı Sahib Alıyev şəhidin valideynlərinə Vətənə layiqli övlad böyütdükləri üçün təşəkkürünü bildirib, Məftunun xatirəsinin həmişə qəlblərdə yaşayacağını vurğulayıb.
Şəhidin ailə üzvləri şəhid ailələrinə göstərilən diqqət və qayğıya görə Prezident, Ali Baş Komandan İlham Əliyevə və Birinci vitse-prezident Mehriban xanım Əliyevaya minnətdarlıqlarını bildiriblər.
Bölmənin digər xəbərləri
