TİBB MƏNTƏQƏSİ VƏ ƏSGƏR YATAQXANASI İSTİFADƏYƏ VERİLMİŞDİR
Daxili işlər naziri general-polkovnik Ramil Usubov, Nərimanov Rayon İcra Hakimiyyətinin başçısı İlqar Abbasov və digər qonaqlar tibb məntəqəsindəki fizioterapiya, manipulyasiya, stomatologiya kabinetləri, yoluxucu xəstəliklərin müalicəsi üçün nəzərdə tutulan palatalarla, aptek və anbarla tanış oldular.
Daxili Qoşunların komandanı general-mayor Zakir Həsənov məlumat verdi ki, daxili imkanlar hesabına müasir tələblərə cavab verən səviyyədə əsaslı bərpa olunmuş bu obyektlərdə Yaponiya və Türkiyədən gətirilmiş avadanlıq quraşdırılmış və əsgərlərin sağlamlığının qorunması üçün hər cür şərait yaradılmışdır. Bildirildi ki, istifadəyə verilən 240 nəfərlik yataqxana xüsusi təyinatlı dəstə üçün nəzərdə tutulmuşdur.
Nazir zabitlər üçün nəzərdə tutulan 5 mərtəbəlı 103 mənzilli yaşayiş binasının tikintisi ilə də maraqlandı. Burada inşaat işlərini DİN-in Tikinti Quraşdırma İdarəsi aparır və bir il ərzində bina istifadəyə veriləcəkdir.
General-polkovnik Ramil Usubov hərbi hissənin qərargahı ilə də tanış oldu, Şərəf kitabını imzaladı və kütləvi informasiya vasitələri nümayəndələrinə qısa müsahibə verdi. O, görülən işləri yüksək qiymətləndirdi, zabitlərin fiziki hazırlığının, hərbi hissədə nizam-intizamın daha da möhkəmləndirilməsi üçün müvafiq tapşırıqlar verdi.
