“TikTok” canlı yayımda musiqi müsabiqəsinə start verir
Bakı, 8 avqust, AZƏRTAC
“TikTok” “The Voice” kimi istedadlar şousuna oxşar musiqi müsabiqəsini keçirəcək. “Gimme the Mic” adlı müsabiqə “TikTok”un canlı efirində keçiriləcək. Qaliblər sosial şəbəkə istifadəçiləri tərəfindən səsvermə yolu ilə seçilə biləcək.
AZƏRTAC “The Verge” nəşrinə istinadla xəbər verir ki, müsabiqə üç mərhələ - dinləmə, yarımfinal və grand-final mərhələlərindən ibarət olacaq. Müsabiqənin birinci mərhələsində iştirak etmək üçün “TikTok”da 30 saniyəlik video yerləşdirmək və ona #gimmethemic həştəqi əlavə etmək lazımdır.
Sonra ən yaxşı 30 iştirakçı yarımfinala keçəcək, burada onlar canlı efirdə duet formasında ifa edəcəklər. ABŞ üzrə finalda sentyabrın 10-da 10 ən yaxşı ifaçı çıxış edəcək, onlardan biri bütün dünyadan olan qaliblərlə qlobal yarışda iştirak edəcək. Qalib mobil tətbiqinin daxili valyutası olan 50 min “TikTok” almazı əldə edəcək.
Almazları real pula dəyişmək mümkün olacaq. Lakin 50 min almazın neçə dollara bərabər olduğu məlum deyil. Mediada qeyd edirlər ki, məbləğ təxminən 2500 dollar təşkil edə bilər.
Bölmənin digər xəbərləri
