“Titanik” filmində istifadə olunan skripka 54 min funt sterlinqə satılıb
London, 28 aprel, AZƏRTAC
Rejissor Ceyms Kemeronun 1997-ci il “Titanik” filmində istifadə olunan skripka İngiltərənin Viltşir bölgəsində keçirilən hərracda 54 min funt sterlinqə (təxminən 72 min ABŞ dolları) satılıb.
AZƏRTAC xəbər verir ki, bu skripkada filmdə gəminin batdığı səhnədə “Nearer My God to Thee” əsəri səsləndirilərkən orkestrin rəhbəri rolunu canlandıran musiqiçi və aktyor Conatan Evans-Jones ifa edib. Aktyor həmin filmdə istifadə etdiyi skripkanı 2013-cü ildə hərraca çıxarmışdı və skripka bir kolleksiyaçı tərəfindən satın alınmışdı. Bu il isə həmin kolleksiyaçı aləti “Henry Aldridge & Son” hərrac evi vasitəsilə yenidən satışa çıxarıb.
Hərracda satılan digər əşyalar arasında “Titanik” fəlakətindən sağ çıxan məşhur şəxsiyyətlərdən biri olan polkovnik Archibald Gracie tərəfindən yazılmış məktub da var idi. Bu məktub 300 min funt sterlinqə satılıb.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
