Tofiq Zülfüqarov: Keçmiş münaqişə dövründə Azərbaycana qarşı ideoloji təsir mexanizmlərindən istifadə olunurdu
Bakı, 12 may, AZƏRTAC
Keçmiş münaqişə dövründə Azərbaycana qarşı yalnız hərbi deyil, eyni zamanda, ideoloji və siyasi təsir mexanizmlərindən də istifadə olunurdu. Məqsəd cəmiyyətin inkişaf prinsiplərinə, milli-mənəvi dəyərlərinə və ictimai düşüncə sisteminə təsir göstərmək, Azərbaycan cəmiyyətinə yad olan yanaşmaları müxtəlif vasitələrlə qəbul etdirmək idi.
AZƏRTAC xəbər verir ki, bu fikirləri Medianın İnkişafı Agentliyinin təşkilatçılığı ilə keçirilən “Prezident İlham Əliyevin sülh strategiyası sabitliyin qarantıdır” mövzusunda dəyirmi masada Azərbaycanın keçmiş xarici işlər naziri Tofiq Zülfüqarov səsləndirib.
O xatırladıb ki, həmin dövrdə Azərbaycana qarşı genişmiqyaslı informasiya, siyasi və ideoloji kampaniyalar aparılırdı. “Bu prosesin əsas məqsədi Azərbaycan cəmiyyətinin daxili dayanıqlığını zəiflətmək, milli prinsiplərə təsir etmək və bizə yad olan müəyyən ideoloji yanaşmaları cəmiyyətə sırımaq idi. Müxtəlif beynəlxalq mexanizmlər və təsir vasitələri ilə Azərbaycana təzyiq göstərilirdi. Bütün bunlarla yanaşı, Ermənistanın Azərbaycana qarşı həyata keçirdiyi işğal siyasəti, total etnik təmizləmə, vəhşiliklər və insanlıq əleyhinə cinayətlər beynəlxalq səviyyədə lazımi şəkildə qiymətləndirilmədi. Biz gördük ki, ərazilərimizdə ağır humanitar cinayətlər törədilməsinə, total etnik təmizləmə siyasəti aparılmasına baxmayaraq, işğalçıya qarşı ciddi təzyiq göstərilmədi. Əksinə, müxtəlif dairələr tərəfindən Ermənistan siyasi, maliyyə və hərbi baxımdan dəstəklənirdi. Ermənistan Rusiya tərəfindən silahlandırılır, Qərbdəki bəzi qüvvələr isə siyasi və maliyyə dəstəyi göstərirdilər. Faktiki olaraq işğalın davam etməsi üçün müəyyən şərait formalaşdırılmışdı”, - deyə keçmiş xarici işlər naziri bildirib.
O vurğulayıb ki, 2020-ci ildə Azərbaycan öz gücü və siyasi iradəsi hesabına beynəlxalq hüququ təmin etdi. “2020-ci ildə Azərbaycan dövləti Prezident İlham Əliyevin qətiyyətli siyasəti nəticəsində beynəlxalq hüquqa uyğun şəkildə hərəkət etdi. Azərbaycan Birləşmiş Millətlər Təşkilatının Nizamnaməsinin 51-ci maddəsinə əsaslanaraq özünümüdafiə hüququndan istifadə etdi və işğalçıya layiqli cavab verdi. Bununla da işğala və onun qalıqlarına son qoyuldu.
Bölmənin digər xəbərləri
