“Türk dilləri ailəsi: ortaq keçmişdən ortaq gələcəyə” adlı konfrans keçirilib
Gəncə, 19 yanvar, Elcan Məmmədov, AZƏRTAC
Türkiyə Respublikasının Gəncədəki baş konsulluğu və Gəncə Dövlət Universitetinin (GDU) birgə təşkilatçılığı ilə “Türk dilləri ailəsi: ortaq keçmişdən ortaq gələcəyə” adlı konfrans keçirilib.
Universitetdən AZƏRTAC-ın bölgə müxbirinə verilən məlumata görə, tədbirdə Azərbaycan Respublikasının Dövlət Himni və Türkiyə Cümhuriyyətinin “İstiqlal marşı” səsləndirilib, şəhidlərin xatirəsi bir dəqiqəlik sükutla yad edilib.
Gəncə Dövlət Universitetinin Humanitar məsələlər üzrə prorektoru Gülsüm Fətəliyeva çıxış edərək bildirib ki, Türk dünyası ortaq tarixə, eyni köklərə və oxşar mədəniyyətə sahib böyük ailədir: “Bizi birləşdirən əsas dəyərlər dilimiz, adət-ənənələrimiz və bir-birimizə olan hörmətimizdir. Bu gün türk dövlətləri bir-biri ilə müxtəlif sahələrdə əməkdaşlıq edir. Təhsil, mədəniyyət, elm və iqtisadiyyat sahələrində qurulan əlaqələr xalqlarımızın daha da yaxınlaşmasına səbəb olur. Prezident İlham Əliyevin dediyi kimi, bizim ailəmiz Türk dünyasıdır. Hər birimiz bu birliyin bir hissəsiyik və onu qorumağa borcluyuq. Xüsusilə gənclərin bu prosesdə rolu çox böyükdür”.
Türkiyə Respublikasının Gəncədəki baş konsulu Recep Öztop çıxışında vurğulayıb ki, tarix və mədəniyyət baxımından min illərlə bir-birinə bağlı olan türk xalqları bu gün də ortaq dil və ideallar ətrafında birləşməkdədir: “2025-ci ildə Səmərqənddə keçirilən UNESCO-nun 43-cü Baş Konfransında 15 dekabr tarixinin Dünya Türk Dili Ailəsi Günü kimi qəbul edilməsi Türk dünyasının elm, mədəniyyət və dil birliyi baxımından son dərəcə əlamətdar və tarixi qərardır. Bu qərar yalnız türkdilli ölkələr arasında mədəni əməkdaşlığın gücləndirilməsi deyil, eyni zamanda, türk xalqlarının ortaq mənəvi köklərinin, dil və dəyərlərinin beynəlxalq miqyasda tanınmasının parlaq göstəricisidir”.
Konfransda Azərbaycanın Türk dünyası ilə əlaqələrinin qurulmasında, münasibətlərin dərinləşməsində, habelə ölkəmizdəki tolerantlıq mühiti və azərbaycançılıq ideologiyasının inkişafında, Azərbaycan dilinin saflığının qorunmasında Ulu Öndər Heydər Əliyevin əvəzsiz xidmətləri xüsusi qeyd edilib.
Gəncə Dövlət Universitetinin Azərbaycan dili kafedrasının müdiri Telman Quliyevin “Müasir dövrdə türk dilləri”, dosent Yadigar Əliyevin “Türk xalqlarının ortaq ünsiyyət dili məsələsi: problemlər və perspektivlər”, dosent Aytən Əhmədovanın “Türk dili ailəsinin Oğuz qrupuna daxil olan xalqların bir qrup sözlərinin semantikası” mövzusunda məruzələri dinlənilib.
Daha sonra GDU-da təhsil alan Türkiyəli tələbələr Esma Karak və Şevval Baday türk xalqlarına həsr edilmiş şeirlər səsləndiriblər.
Konfransda onlayn formatda iştirak edən Qafqaz Universitetinin professoru İlkin Qulusoy, Aydın Adnan Menderes Universitetinin professoru Ahmet Toksoy və Özbəkistan Elmlər Akademiyasının Özbək Dili, Ədəbiyyatı və Folkloru İnstitutunun dosenti Gulnoz Sattorova məruzələrlə çıxış ediblər.
Sonda Türkiyə Ardahan Universitetinin professoru Şurəddin Məmmədlinin “Gürcüstanda Azərbaycan ədəbiyyatı məsələləri” və Ege Universitetinin əməkdaşı Asuman Gürman Şahinin “Keçmişdən günümüzə dil birliyimiz” mövzularında çıxış videoçarxları izlənilib.
Bölmənin digər xəbərləri
