Türkiyə-Azərbaycan birgə təlimlərinin hərbi, siyasi və psixoloji əhəmiyyəti böyükdür – AÇIQLAMA
Bakı, 26 oktyabr, AZƏRTAC
Türkiyə-Azərbaycan qardaşlığı ən yüksək səviyyədə davam edir və bunun ən böyük təntənəsi Şuşa Bəyannaməsidir. Bu bəyannamə bütün sahələrdə, o cümlədən siyasi, iqtisadi, humanitar və hərbi sahədə münasibətlərin daha da dərinləşməsini ehtiva edir. Hazırda Azərbaycan-Türkiyə hərbi əməkdaşlığı ən yüksək səviyyədədir. Prezident İlham Əliyevin tapşırığına uyğun olaraq Azərbaycan Silahlı Qüvvələri türk ordu modelinə keçib. Bunun üçün müvafiq qanunverici baza müəyyənləşib.
“Tərxis Olunmuş Hərbçilərin Gəncləri Maarifləndirmə” İctimai Birliyinin və “Qardaşlığımız Əbədidir” QHT Koalisiyasının sədri Emin Həsənli uğurla başa çatan "Mustafa Kamal Atatürk - 2023” birgə taktiki təliminin önəmini AZƏRTAC-a şərh edərkən deyib ki, hazırda Türkiyə ilə birlikdə müxtəlif qoşun növləri üzrə xeyli sayda təlimlər keçirilir.
Emin Həsənlinin sözlərinə görə, bu təlimlər adətən qardaş ölkədə və Azərbaycanda təşkil olunur. Bu dəfə isə Azərbaycan Ordusunun və Türkiyə Silahlı Qüvvələrinin hərbi qulluqçularının cəlb edildiyi təlimlər ölkəmizin işğaldan azad edilmiş ərazilərini də əhatə etdi. Türkiyə şahinləri Azərbaycan pilotlari ilə birlikdə Bakıda, Naxçıvanda və azad olunmuş ərazilərin üzərində uçuşlar yerinə yetirdilər. Bunun çox böyük önəmi var. İndi dünya ən gərgin dövrünü yaşayır. Belə ki, Rusiya ilə Ukrayna, HƏMAS ilə İsrail arasında və dünyanın bir çox yerlərində müharibələr davam edir. Belə savaşların hökm sürdüyü regionda hər bir dövlətin öz müstəqilliyini və ərazi bütövlüyünü qoruması baxımından güclü ordusunun mövcudluğu mühüm əhəmiyyət kəsb edir. Türkiyə Azərbaycan dövlətinin təminatçısı, Azərbaycan isə qardaş respublikanın zəmanətçisidir. Şuşa Bəyannaməsinə uyğun olaraq iki ölkənin birinə hər hansı hücum olarsa, digər dövlətin ona hərbi yardım göstərmək hüququ var. Bunun üçün də qoşunların əlaqəli fəaliyyəti çox vacibdir.
İctimai Birliyin sədri vurğulayıb ki, keçirilən birgə təlimlər orduların təcrübələrini daha da artırır. Qardaş ölkənin terrora qarşı fəaliyyətdə də çox böyük müharibə təcrübəsi var. Azərbaycan Ordusunun İkinci Qarabağ müharibəsində və birgünlük antiterror tədbirlərində qazandığı nəhəng təcrübəni bölüşməsi çox önəmlidir. Ona görə də təlimlərin keçirilməsinin hərbi, siyasi, mənəvi-psixoloji əhəmiyyəti həddindən artıq böyükdür.
Bu il oktyabrın 29-da qardaş Türkiyə Respublikasının yaradılmasının 100 illiyi tamam olacaq. Cümhuriyyət ən ağır şərtlərlə qurucusu Mustafa Kamal Atatürkün rəhbərliyi ilə onun silah yoldaşları ilə birgə yaradıldı. Azərbaycan türkləri də həm Çanaqqalada, həm də İstiqlal savaşında döyüşərək maddi dəstək olub və bütün imkanlarını səfərbər ediblər.
“Türkiyə həmişə Azərbaycanın yanında, Azərbaycan isə Türkiyənin yanında olub. Mustafa Kamal Atatürk deyirdi “Azərbaycanın sevinci sevincimiz, kədəri kədərimizdir”. O, Qars müqaviləsini imzalayaraq Naxçıvanı daim zəmanətə aldı. Ən ağır şərtlərdə Naxçıvanın İğdırla, Türkiyənin Azərbaycanla gələcəkdə əlaqəsi üçün çox böyük işlər gördü. Odur ki, təlimlərin Atatürkün adını daşıması heç də təsadüfi deyil. Ulu Öndər Heydər Əliyev hər zaman Atatürkün fəaliyyətinə yüksək qiymət verib və “Bir millət, iki dövlət” prinsipinə əsaslanan Türkiyə Azərbaycan qardaşlığı günümüzdə də inkişaf edir”, - deyə E.Həsənli söyləyib.
Onun sözlərinə görə, Rəcəb Tayyib Ərdoğan və İlham Əliyev bu siyasəti ən yüksək səviyyədə davam etdirir: “Türkiyə Prezidenti 44 günlük Vətən müharibəsində Azərbaycana dəstək oldu. Azərbaycan Prezidenti də Türkiyənin ən çətin zamanlarında - zəlzələdə, meşə yanğınlarında onun yanında oldu. Ümummilli Lider Heydər Əliyev Azərbaycanın neft və qaz ehtiyatlarının qardaş ölkə vasitəsilə dünya bazarlarına çıxarılmasına çalışırdı. Türkiyə ən ağır zamanlarda ölkəmizin, Azərbaycan isə ən ağır dövrlərdə qardaş dövlətin yanında olub. Prezidentlərimiz İlham Əliyev və Rəcəb Tayyib Ərdoğan bu əlaqələri ən yüksək səviyyələrə çatdırıblar.
Belə hərbi təlimlərin Türkiyə Cümhuriyyətinin 100 illiyi ərəfəsində, torpaqlarımızın işğaldan azad edilməsindən və suverenliyimiz bərpa edildikdən sonra azad olunmuş torpaqlarda, həmçinin Bakıda və Naxçıvanda keçirilməsinin də böyük rəmzi mənası var. Bu həm Türkiyə Respublikasının 100-cü ildönümünə, həm də torpaqlarımızın düşmən işğalından azad edilməsinə böyük hədiyyədir. Təlimlə bütün dünyada yaşayan xalqlara və dövlətlərə də qardaşlıq və bərabərlik mesajı verildi”.
Bölmənin digər xəbərləri
