Türkiyədə il ərzində 1 milyon turist hava şarı ilə səyahət edib
Ankara, 25 iyun, AZƏRTAC
Türkiyədə son bir il ərzində 1 milyon turist hava şarında uçmaq fürsətindən istifadə edib.
AZƏRTAC xəbər verir ki, bu barədə Ankarada Türkiyə Mülki Aviasiya Baş İdarəsinin (SHGM) nümayəndələri məlumat veriblər.
İdarənin məlumatına görə, təkcə ötən il ölkədə 43 283 hava şarı uçuşu həyata keçirilib.
Üstəlik, uçuşların coğrafiyası təkcə turistlər arasında populyar olan Kappadokiya bölgəsi (Nevşehir vilayəti) ilə məhdudlaşmır. Bu xidmətdən Pamukkale (Denizli vilayəti), Soğanlı (Kayseri vilayəti), İlhara vadisi (Aksaray vilayəti), Frig vadisi (Afyonkarahisar vilayəti) kimi yerlərdə də istifadə etmək olar. Anadolunun hava şarı uçuşlarının təşkil olunmağa başladığı son bölgə Antalyanın Aspendos bölgəsi olub. “Bu turizm xidmətinin populyarlığı getdikcə artır və bu, həmin sektorda şirkətlərin böyüməsinə səbəb olub . Eyni zamanda, işçilərin sayı bir il ərzində 8,5 faiz (654 nəfərdən 710 nəfərə qədər) artıb”, -deyə SHGM nümayəndələri bildiriblər. Onların sözlərinə görə, bu gün Türkiyədə hava şarları ilə uçuşları təşkil etmək üçün lisenziyası olan 67 şirkət fəaliyyət göstərir. Hava şarlarının sayı 434, pilotlarının sayı isə 682-dir.
Həmçinin ölkədə hava şarları pilotlarının hazırlanması üçün 6 təlim mərkəzi fəaliyyət göstərir.
Türkiyə turizm sektoru nümayəndələrinin proqnozlarına görə, 2030-cu ilə qədər hava şarı ilə uçuş xidmətindən istifadə edən turistlərin sayı 2 milyon nəfərə çatacaq.
Ankara
Bölmənin digər xəbərləri
