Türkiyədə “Qərbi Azərbaycan hekayələri” adlı kitabın təqdimatı olub
Ankara, 14 oktyabr, AZƏRTAC
Oktyabrın 14-də Ankarada “Qərbi Azərbaycan hekayələri” adlı kitabın təqdimatı keçirilib.
AZƏRTAC xəbər verir ki, tədbir Türkiyənin nüfuzlu ali təhsil ocaqlarından olan Qazi Universitetinin Tədris fakültəsində, Azərbaycanın Türkiyədəki səfirliyinin nəzdindəki Azərbaycan Mədəniyyət Mərkəzinin “Azərbaycan Dili Tədrisi Ocağında” təşkil olunub.
Tədbirdə Azərbaycan Mədəniyyət Mərkəzinin, Türk Dünyası Araşdırma Mərkəzinin, Qazi Universitetinin təmsilçiləri, hər iki ölkədən alimlər, şairlər, yazıçılar və tələbələr iştirak ediblər.
Mərasimdə Türkiyədəki Azərbaycan Mədəniyyət Mərkəzinin direktoru Samir Abbasov, Yıldırım Beyazıt Universitetinin professoru, Qərbi Azərbaycan İcmasının Ankara təmsilçisi Seyid Aydın, Qazi Universitetinin Türk Dünyası Araşdırma və Uyğulama Mərkəzinin icraçı direktoru, professor Alev Kuru Çakmakoğlu, Kahramanmaraş Sütçü İmam Universitetinin dosenti Mərziyyə Məmmədli və layihə rəhbəri İntiqam Yaşar çıxış ediblər.
Azərbaycan Mədəniyyət Mərkəzinin direktoru Samir Abbasov bildirib ki, “Qərbi Azərbaycan hekayələri” adlı kitab tariximizin yaşadılması istiqamətdə bir addımdır. Onun sözlərinə görə, bir insan torpağını itirə bilər, ancaq yaddaşını itirməməlidir: “O torpaqlarda hazırda azərbaycanlılar yaşamasa da, biz istəyirik ki, mədəniyyətimiz və tariximiz unudulmasın. Ədəbiyyat yaddaşın ən etibarlı daşıyıcısıdır. Qərbi Azərbaycanın səsini gələcəyə çatdırır”.
Çıxışlarda Qərbi Azərbaycanın tarixi, ədəbi və mənəvi irsi, eləcə də Azərbaycan mədəniyyətinin Türkiyədə təbliği istiqamətində həyata keçirilən ortaq layihələrin əhəmiyyəti vurğulanıb. Qeyd olunub ki, “Qərbi Azərbaycan hekayələri” adlı kitabın nəşri Azərbaycan yaddaşının, ədəbiyyatının və mənəvi irsinin yaşadılması yolunda atılmış əlamətdar addımdır.
Kitab şair, publisist, Azərbaycan Yazıçılar Birliyinin üzvü, Dünya Gənc Türk Yazarlar Birliyinin İdarə Heyətinin sədri İntiqam Yaşarın layihə rəhbərliyi ilə hazırlanıb.
İntiqam Yaşar çıxışında qeyd edib ki, Qərbi Azərbaycan da əsrlər boyu zəngin mədəni irsə sahib olub və bu irs Azərbaycan xalqının tarixi yaddaşının ayrılmaz hissəsidir. O vurğulayıb ki, Qərbi Azərbaycanın şəhərləri və kəndləri təkcə tarixi abidələri ilə deyil, həm də yetişdirdiyi görkəmli alimlər, şairlər və sənətkarlarla mədəniyyətimizin formalaşmasında mühüm rol oynayıb. İ.Yaşarın fikrincə, bu dərin mədəni köklər xalqımızın mənəvi birliyinin təməlini təşkil edir.
Qeyd edək ki, kitabda yer alan beş fərqli hekayəni hazırlayan yazarların hər biri Qərbi Azərbaycan torpağının yetirməsidir. Bu hekayələr Azərbaycan yazıçıları Mahirə Nağıqızı, Azər Abdulla, Məmməd Oruc, Güldərən Vəliyeva və Şəfa Vəli tərəfindən qələmə alınıb. Əsərlərdə Qərbi Azərbaycanın tarixi yaddaşı, deportasiya mövzusu və milli kimliyin qorunması kimi mövzular öz əksini tapıb.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
