Türkiyədə üç təhlükəli terrorçu zərərsizləşdirilib
Ankara, 2 oktyabr, AZƏRTAC
Türkiyə təhlükəsizlik qüvvələrinin üç gün əvvəl ölkədə həyata keçirdiyi antiterror əməliyyatları nəticəsində zərərsizləşdirilən beş terrorçunun şəxsiyyəti müəyyən edilib.
AZƏRTAC xəbər verir ki, bu əməliyyat Siirt vilayətinin Eruh rayonu ərazisində keçirilib. Müəyyən olunub ki, zərərsizləşdirilən terrorçulardan biri “Serhat İğdır” ləqəbli Atilla Çakmazdır. Daxili İşlər Nazirliyi onun ələ keçirilməsi üçün 300 min lirə (təxminən 53 min ABŞ dolları) mükafat ayırmışdı.
Daha bir xüsusi antiterror əməliyyatı Əskişəhərdə keçirilib. Sentyabrın 25-də Adanada 22 nəfərin yüngül xəsarət alması ilə nəticələnən terror aktını törədən iki MLKP terrorçusunun Əskişəhərdə qaldığı ev müəyyən olunub. Əskişəhərdə həmin terrorçularla polislər arasında atışma baş verib. Ozan Sözmen və Fırat Şeran adlı hər iki terrorçunun məhv edildiyi bildirilir. Silahlı müqavimət nəticəsində iki polis əməkdaşı da yüngül xəsarət alıb.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
