Türkiyənin neft şirkətləri Qazaxıstanın “Böyük Jambıl” layihəsini qiymətləndirir
Astana, 23 yanvar, AZƏRTAC
Ankarada “KazMunayGaz” ASC-nin İdarə Heyətinin sədri Ashat Xasenov Türkiyənin dövlət şirkəti olan Türk Neft Korporasiyasının (TPAO) baş direktoru Cem Erdem ilə görüşüb.
AZƏRTAC “KazMunayGaz”ın internet saytına istinadla xəbər verir ki, görüşdə geoloji kəşfiyyat, karbohidrogen istehsalı və investisiya sahəsində ikitərəfli əməkdaşlığın genişləndirilməsi müzakirə olunub.
2025-ci ilin iyun ayında məxfilik müqaviləsi imzalandıqdan sonra KMG ilə TPAO Qazaxıstan və Türkiyədə aktiv şəkildə məlumat mübadiləsi aparır və kəşfiyyat layihələrini öyrənir. Əvvəllər TPAO mütəxəssisləri üçün ətraflı texniki sessiyalar keçirilib və perspektivli kəşfiyyat sahələri haqqında geoloji məlumatlara çıxış əldə edilib.
Təhlildən sonra türk tərəfdaşlar “Böyük Jambıl” dəniz layihəsinə (Şimali Xəzər) diqqət yetiriblər. TPAO hazırda bu sahə üçün özünün ətraflı texniki-iqtisadi əsaslandırmasını aparır.
Xasenov KMG-nin bu layihənin praktiki tətbiq mərhələsinə keçməyə tam hazır olduğunu bildirib.
Görüşdən sonra tərəfdaşlığın daha da gücləndirilməsində qarşılıqlı maraq təsdiqlənib.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
