Türkmənistan nəhəng qlobal şirkətlərin iştirak edəcəyi “CIET-2025” beynəlxalq sərgi-konfransına hazırlaşır
Bakı, 14 oktyabr, AZƏRTAC
2025-ci il noyabrın 3-4-də Xəzər dənizi sahilindəki Avaza Milli Turizm Zonasında “Türkmənistanın tikinti, sənaye, kimya və enerji sektorunun inkişafı – CIET 2025” adlı beynəlxalq konfransı və sərgisi keçiriləcək.
AZƏRTAC türkmən mediasına istinadla xəbər verir ki, bu forum Türkmənistanın tikinti, sənaye və enerji sektorlarının inkişafında maraqlı olan hökumət rəsmiləri, şirkət rəhbərləri və investorlar arasında konstruktiv dialoq üçün mühüm platforma olacaq. Tədbirin məqsədi beynəlxalq əməkdaşlığı gücləndirmək, qabaqcıl texnologiyaların təşviqi və ölkədə davamlı sənaye artımına kömək etməkdir.
CIET 2025 sərgisi Türkmənistan Sənaye və Tikinti Nazirliyi tərəfindən Türkmən Enerji Forumu ilə birgə təşkil olunur.
Konfrans "Ağıllı tikinti, təmiz enerji, davamlı gələcək" devizi altında keçiriləcək. Bu şüar Türkmənistanın innovasiyalar, yaşıl texnologiyalar və beynəlxalq investisiya tərəfdaşlıqları üçün regional mərkəz kimi strateji baxışını əks etdirir.
Konfransda dünyanın müxtəlif iri biznes dairələrinin, o cümlədən Xəzəryanı ölkələrin şirkətlərinin iştirak edəcəyi gözlənilir. Tədbirin tarixində ilk dəfə olaraq mərkəzi ofisi Dubayda yerləşən Yaxın Şərqin ən böyük developerlərindən biri olan “DAMAC Properties”, həmçinin “Bitdeer Technologies Group” (NASDAQ) və “S&P Global Commodity Insights” qlobal kompaniyalarının nümayəndələri təqdimatlarla çıxış edəcəklər.
Bölmənin digər xəbərləri
