Aşqabad, 29 may, AZƏRTAC

Azərbaycanın Türkmənistandakı səfirliyi tərəfindən Aşqabad şəhərinin ən böyük tədbir salonunda Azərbaycan Xalq Cümhuriyyətinin 100 illik yubileyi və Respublika Günü münasibətilə təntənəli rəsmi qəbul keçirilib.

Qəbulda Türkmənistan Nazirlər Kabinetinin sədr müavini Muradgəldi Meredov, ictimai xadimlər, Türkmənistanda fəaliyyət göstərən xarici ölkələrin və beynəlxalq təşkilatların diplomatik nümayəndəliklərinin rəhbərləri və burada yaşayan soydaşlarımız iştirak ediblər.

Azərbaycanın və Türkmənistanın dövlət himnlərinin səsləndirilməsi ilə başlayan tədbirdə daha sonra Azərbaycanın Türkmənistandakı fövqəladə və səlahiyyətli səfiri Həsən Zeynalov çıxış edərək Azərbaycan Xalq Cümhuriyyətinin müsəlman Şərqində yaranmış ilk demokratik, dünyəvi respublika olduğunu, mürəkkəb geosiyasi şəraitdə yarandığını, buna baxmayaraq, dünya ictimaiyyəti tərəfindən tanındığını və beynəlxalq hüququn subyektinə çevrildiyini diqqətə çatdırıb.

Qısa müddətdə siyasi, iqtisadi, mədəni, təhsil sahələrində böyük islahatların və müdafiə qabiliyyətinin möhkəmləndirilməsinin Cümhuriyyətin əsas nailiyyətləri olduğunu bildirən səfir bu islahatlar içərisində ən vacibi kimi etnik, dini, cinsi və siyasi mənsubiyyətindən asılı olmayaraq bütün vətəndaşlara bərabər hüquqların verildiyini qeyd bildirib. Dövlət aparatının təşkil olunduğunu, sərhədlərin müəyyənləşdirildiyini, dövlət atributlarının təsdiq edildiyini, eləcə də dövlət quruculuğu sahəsində digər ciddi addımların atıldığını diqqətə çatdıran Həsən Zeynalov Azərbaycan Xalq Cümhuriyyətinin cəmi 23 ay yaşamasına baxmayaraq, Azərbaycan xalqının demokratik prinsiplər əsasında özünün milli dövlətini qura bilmək bacarığını ortaya qoyduğunu bildirib.

Müasir Azərbaycan Respublikasının 1991-ci ildə öz müstəqilliyini bərpa edərkən Azərbaycan Xalq Cümhuriyyətinin siyasi, hüquqi və mənəvi varisi olduğunu bəyan etməsi, eləcə də onun atributlarını özünün dövlət rəmzləri kimi qəbul etməsi, xalqımızın qədim dövlətçilik ənənələrinə sadiqliyini nümayiş etdirdiyini bildirən səfir müstəqillik illərində ümummilli lider Heydər Əliyev tərəfindən uğurla həyata keçirilən siyasətin nəticəsində ölkəmizdə ictimai-siyasi sabitliyin yarandığını, hüquqi dövlət və vətəndaş cəmiyyətinin qurulması istiqamətində böyük nailiyyətlər qazanıldığını, bazar iqtisadiyyatının formalaşdığını, Azərbaycanın dünya birliyinə inteqrasiya olunduğunu vurğulayıb.

Bu gün Azərbaycanın Prezidenti İlham Əliyevin rəhbərliyi ilə sürətlə inkişaf etdiyini qeyd edən səfir iqtisadiyyatın və ictimai-siyasi həyatın bütün sahələrində beynəlxalq təşkilatlar tərəfindən də yüksək qiymətləndirilən irihəcmli layihələrin həyata keçirildiyini söyləyib. Buna misal olaraq, Azərbaycanın təşəbbüskarı olduğu və reallaşmasında aktiv iştirakçı olduğu Cənub Qaz Dəhlizinin, Şərq-Qərb və Şimal-Cənub nəqliyyat dəhlizləri xüsusi qeyd olunub.

Azərbaycanın çoxsaylı nailiyyətləri ilə yanaşı, Dağlıq Qarabağ regionu və ətraf rayonlarının Ermənistan tərəfindən işğal edilməsi ilə bağlı həll olunmamış probleminin olduğunu da bildirən səfir dünya ictimaiyyətinin, beynəlxalq təşkilatların, o cümlədən BMT Təhlükəsizlik Şurasının Azərbaycan Respublikasının ərazi bütövlüyünü tanıdığını və işğal olunmuş ərazilərin təcili azad edilməsini tələb etdiyini bildirib.

Azərbaycan ilə Türkmənistan arasındakı münasibətlərə toxunan səfir bu gün prezidentlər İlham Əliyev və Qurbanqulu Berdiməhəmmədov tərəfindən ölkələrimiz arasındakı əlaqələrin əsas istiqamətlərinin müəyyən edildiyini, Türkmənistanla əlaqələrin hərtərəfli inkişafının Azərbaycanın xarici siyasətinin əsas istiqamətlərindən biri olduğunu diqqətə çatdırıb.

Azərbaycanın və Türkmənistanın regionda iri iqtisadi layihələrin təşəbbüskarı olduğunu qeyd edən səfir ölkələrimizin böyük İpək yolunun bərpasında və gələcək inkişafında aktiv iştirak etdiklərini diqqətə çatdırıb. Müasir nəqliyyat infrastrukturunun yaradılmasının, o cümlədən bir qədər əvvəl Bakı-Tbilisi-Qars dəmir yolunun və Azərbaycanda və Türkmənistanda beynəlxalq dəniz limanlarının açılışının bu istiqamətdə əməkdaşlığın inkişafına güclü təkan olacağı vurğulanıb.

Türkmənistan Prezidentinin keçən ilin avqust ayında Azərbaycana səfəri zamanı aparılan müzakirələrin və imzalanan sənədlərin ikitərəfli əlaqələrin inkişafında yeni səhifə açdığını qeyd edən səfir bu əlaqələrin gələcək inkişafına inamını ifadə edərək, qəbulda iştiraka görə qonaqlara təşəkkürünü bildirib.

Daha sonra çıxış edən Türkmənistan Nazirlər Kabinetinin sədr müavini Muradgəldi Meredov Türkmənistanın Prezidenti, hökuməti və xalqı adından Azərbaycan Xalq Cümhuriyyətinin 100 illik yubileyi və Respublika Günü münasibətilə qardaş Azərbaycan xalqını təbrik edib, xalqımıza sülh, inkişaf və uğurlar arzulayıb.

Türkmənistan hökumətinin, eləcə də şəxsən Prezident Qurbanqulu Berdiməhəmmədovun Türkmənistan-Azərbaycan münasibətlərinə böyük əhəmiyyət verdiyini deyən Muradgəldi Meredov hazırda iki ölkə arasında siyasi, iqtisadi, energetika və sərmayə qoyuluşu sahələrində əlaqələrin üstünlük təşkil etdiyini, əlaqələrimizin dostluq və qardaşlıq, qarşılıqlı hörmət, eləcə də xalqlarımızın ənənələrinə layiq səviyyədə qurulduğunu diqqətə çatdırıb.

Mövcud siyasi əlaqələrin, eləcə də yüksək səviyyədə keçirilən müzakirələrin Türkmənistan-Azərbaycan münasibətlərinin möhkəm təmələ söykəndiyinin göstəricisi olduğunu qeyd edən qonaq buna keçən ilin avqust ayında Türkmənistan Prezidenti Qurbanqulu Berdiməhəmmədovun Azərbaycana rəsmi səfərinin bariz misal olduğunu bildirib. Türkmənistan tərəfinin bu səfərə dövlətlərarası əlaqələrin tarixində mühüm hadisə, ikitərəfli əlaqələrin genişlənməsi yolunda böyük addım hesab etdiyini diqqətə çatdıran M.Meredov səfər çərçivəsində dövlət başçıları tərəfindən imzalanmış strateji əməkdaşlıq haqqında Bəyannamənin əlaqələrimizin səviyyəsinin göstəricisi olduğunu qeyd edib.

Yanacaq-energetika potensiallarının və coğrafi mövqelərinin iki ölkə arasında həm energetika, həm də nəqliyyat sahəsində yaxın əməkdaşlıq etmələri üçün böyük imkanlar açdığını bildirən qonaq enerji ehtiyatlarının istismarında, dünya bazarlarına etibarlı və təhlükəsiz çatdırılmasında, nəqliyyat dəhlizlərinin şaxələndirilməsində əməkdaşlığın genişləndirilməsinin əhəmiyyətinə diqqət çəkib. Ölkələrimizin Avropanı və Asiyanı birləşdirən vacib həlqələr olduğu ifadə edilib və bir neçə gün əvvəl açılışı olmuş Türkmənbaşı beynəlxalq dəniz limanının iki ölkə arasında nəqliyyatın inkişafına böyük töhfə verəcəyi vurğulanıb.

Ölkələrimiz arasındakı əlaqələrin xalqlarımızın çoxəsrlik dostluq, qardaşlıq münasibətlərinə və bərabərhüquqlu tərəfdaşlıq prinsiplərinə söykəndiyini bildirən M.Meredov Türkmənistanın Azərbaycanla əlaqələrin inkişafında maraqlı olduğunu, azərbaycanlı tərəfdaşları türkmən iqtisadiyyatının inkişafında iştirak etməyə dəvət etdiklərini, eləcə də əməkdaşlığı davam etdirmək və genişləndirmək məqsədində olduqlarını diqqətə çatdırıb.

Sonda bir daha Türkmənistan hökumətinin, xalqının adından və öz adından dost Azərbaycan xalqını Azərbaycan Xalq Cümhuriyyətinin şanlı 100 illik yubileyi münasibətilə təbrik edən qonaq Azərbaycan xalqına sülh, əmin-amanlıq, xoşbəxtlik və inkişaf arzu edib.

Çıxışlardan sonra ziyafət verilib. Ziyafətdə Azərbaycandan gəlmiş incəsənət xadimləri milli musiqi nümunələri ilə çıxış ediblər. Tədbir zamanı Üzeyir Hacıbəylinin və Qara Qarayevin əsərlərindən nümunələr səsləndirilib, incəsənət xadimlərinin çıxışları böyük maraqla qarşılanıb.

İlahə Əhmədova

AZƏRTAC-ın xüsusi müxbiri

Aşqabad