UEFA KUBOKU TURNİRİNİN TARİXİNDƏN
Xəbər verdiyimiz kimi, mayın 16-da Şotlandiyanın paytaxtı Qlazqo şəhərində klublar arasında qitənin ikinci mötəbər futbol turniri olan UEFA kubokunun finalında 2 isran klubu - ötənilki turnirin qalibi “Sevilya” və “Espanyol” qarşılaşacaqdır.
AZƏRTAC xəbər verir ki, bu oyun 49-cu dəfə keçirilən turnirin final görüşündə eyni ölkə klublarının bir-biri ilə ümumiyyətlə, 9-cu qarşılaşması olacaqdır. İki ispan klubunun final görüşündə qarşılaşması (3 dəfə) bu turnirin keçirilməyə başlandığı ilk illərə təsadif etmişdir. Belə ki, 1962-ci ildə “Valensiya” “Barselona”nı (6:2, 1:1), 1964-cü ildə “Saraqosa” “Valensiya”nı (2:1), 1966-cı ildə “Barselona” “Saraqosa”nı (0:1, 4:2) məğlub etmişdir. 1964-65-ci illərdə və 1997-ci ildən sonra turnirin final görüşü bir oyundan ibarət olaraq neytral meydançada keçirilir.
Finalda bir-birilə ən çox italyan komandaları görüşmüşlər, lakin ispanlar mayın 16-da bu göstəricini təkrarlayacaqlar. 1990-cı ildə “Yuventus” “Fiorentina”nı (3:1, 0:0), 1991-ci ildə “İnter” “Roma”nı (2:0, 0:1),
1995-ci ildə “Parma” “Yuventusu” (1:0, 1:1) və nəhayət, 1998-ci ildə “İnter” “Latsio”nu (3:0) udmuşdur. Ümumiyyətlə, 1990-2000-ci illəri əhatə edən 10 il ərzində italyan klubları UEFA kuboku turnirində 7 dəfə qalib gəlmişlər.
Xatırladaq ki, 1972-ci ildə finalda iki ingilis klubu (“Tottenhem”-“Vulverhempton” - 2:1, 1:1), 1980-ci ildə isə alman komandaları (“Ayntraxt”-“Borussiya” Münhenqladbax - 2:3, 1:0) görüşmüşlər.
Bölmənin digər xəbərləri
