Ukrayna qoşunları Krım körpüsü yaxınlığında bir neçə vacib hədəfə zərbələr endirib
Kiyev, 21 iyun, AZƏRTAC
Ukrayna qoşunları Krım körpüsünün yaxınlığında və işğal olunmuş Krım ərazisində bir neçə vacib hədəfə zərbələr endirərək düşmənin logistika və hava hücumundan müdafiə sistemlərinə hücum edib.
AZƏRTAC bu barədə Ukrayna Prezidenti Volodimir Zelenskinin “Telegram” səhifəsinə istinadla xəbər verir.
Ölkə başçısının sözlərinə görə, əməliyyat Rusiyanın Ukrayna əhalisinə qarşı hücumlarına cavab olub. Əməliyyatda Ukrayna Təhlükəsizlik Xidmətinin, Pilotsuz Sistemlər Qüvvələrinin, Baş Kəşfiyyat İdarəsinin və Xüsusi Əməliyyat Qüvvələrinin bölmələri iştirak edib.
Dövlət başçısı qeyd edib ki, zərbələr cəbhə xəttindən təxminən 300 kilometr aralıda yerləşən hərbi logistika, neft sənayesi və Rusiya hava hücumundan müdafiə obyektlərini hədəf alıb.
“Krım körpüsünün hər iki tərəfindəki obyektlərə zərbə endirilib: Krasnodar diyarında neft daşınması üçün dəniz logistika obyekti və müvəqqəti işğal olunmuş Kerç şəhərindəki neft bazası”, - deyə o, dəqiqləşdirib.
Bundan əlavə, Zelenskinin sözlərinə görə, düşmənin hərbi logistika obyektləri, S-400 zenit-raket sistemlərinin bir hissəsi olan dörd radar stansiyası və iki “Pantsir” raket sistemi uğurla vurulub.
Bölmənin digər xəbərləri
