Ukrayna Rusiya ilə yeni əsir mübadilələrinə hazırlaşır
Kiyev, 29 aprel, AZƏRTAC
Ukrayna Rusiya ilə yeni əsir mübadilələrinin hazırlanması üzərində işləyir. Mübadilə üçün zəruri sənədlər və siyahılar artıq Koordinasiya Qərargahı tərəfindən hazırlanıb.
AZƏRTAC xəbər verir ki, bu barədə Ukrayna Prezidenti Volodimir Zelenskinin bəyanatında bildirilir.
O, hərbi əsirlərlə davranış üzrə Koordinasiya Qərargahı ilə keçirilən görüşün nəticələrindən danışıb.
“Bu il artıq baş tutmuş mübadilələrin nəticələrini və növbəti mübadilələrə hazırlıq məsələlərini müzakirə etdik. Ümid edirik ki, yaxın vaxtlarda hazırda əsirlikdə olan ukraynalıları evdə qarşılaya biləcəyik”, – deyə dövlət başçısının bəyanatında qeyd olunub.
Onun sözlərinə görə, Koordinasiya Qərargahı bu kimi humanitar məsələlərlə bağlı Moskva ilə daimi əlaqə saxlayır: “İndiyədək əsirlikdə qalan istər hərbçi olsun, istərsə də mülki şəxs, heç bir vətəndaşımızı unutmuruq. Müharibə başlamazdan əvvəl əsir düşən şəxslərə də ayrıca diqqət yetirilir. Məqsəd bütün ukraynalıların vətənə qaytarılmasıdır. Hər bir soyad üzrə yoxlama aparılır. Çünki bəzən şəxs itkin düşmüş hesab olunur, lakin əslində Rusiyadakı düşərgələrdə saxlanılır. Əsir düşənlərin bütün kateqoriyaları üzrə irəliləyişə nail olmaq vacibdir: jurnalistlər, şəhər merləri və icma rəhbərləri, energetika işçiləri, döyüşçülərimiz – azovçular, dəniz piyadaları, desantçılar və mübadilə prosesinin xüsusilə çətin getdiyi digər şəxslər”, – deyə Ukrayna lideri vurğulayıb.
Bölmənin digər xəbərləri
