Ukrayna və Polşa arasında diplomatik qalmaqal böyüyür
Kiyev, 20 iyun, AZƏRTAC
Ukrayna ilə Polşa arasında münasibətlərin gərginliyi artmaqda davam edir. Diplomatik qalmaqallara səbəb olan daha bir hadisə isə Ukrayna Prezidenti Volodimir Zelenskinin Polşanın ali medaldan məhrum edilməsidir.
AZƏRTAC xəbər verir ki, iyunun 19-da Polşa Prezidenti Karol Navrotskiy Ukrayna Prezidenti Volodimir Zelenskini Polşanın ən yüksək dövlət mükafatı olan “Ağ Qartal” ordenindən məhrum etmək qərarına gəlib. Polşa lideri qərarını "ən yüksək dövlət mükafatının şərəfinin keşiyində durmaq" zərurəti ilə izah edərək əlavə edib ki, ölkələrin gələcəyi yalnız həqiqət üzərində qurulmalıdır.
Varşavanın bu addımı Ukrayna ilə Polşa arasında tarixi məsələlərlə bağlı daha bir diplomatik mübahisədən sonra baş verib. Böhranın əsas səbəbi Volodimir Zelenskinin "Şimal" Xüsusi Əməliyyat Mərkəzinə "UÜO Qəhrəmanları" fəxri adının verilməsi ilə bağlı fərmanı idi.
Qeyd edək ki Ukrayna Üsyançı Ordusu (UÜO) İkinci Dünya müharibəsi dövründə Ukraynanın gizli hərbi təşkilatı, Ukrayna Millətçiləri Təşkilatının silahlı bir qolu, Ukraynadakı qeyri-kommunist müqavimət hərəkatının ən əhəmiyyətli qüvvəsi idi.
Zelenskinin bu qərarı isə rəsmi Varşavanın narazılığına səbəb olub. UÜO-nun yalnız Volın faciəsi ilə əlaqələndirildiyi və xalqın soyqırımı hesab edildiyi Polşada bu qərar Xarici İşlər Nazirliyinin rəsmi etirazına və siyasətçilər arasında qəzəb dalğasına səbəb olub. Eyni zamanda, Varşava tarixi mübahisələrdən təzyiq vasitəsi kimi istifadə etməyə başlayıb ki, bu da potensial olaraq Avropaya inteqrasiyanı və Ukraynanın gələcəkdə Avropa Birliyinə daxil olmasını çətinləşdirə bilər.
Ukraynanın xarici işlər naziri Andrey Sibiqa Varşavadakı emosiyaların Polşa siyasətçilərini Ukraynaya qarşı əsassız və rədd cavabı verən addımlar atmağa vadar etməsindən təəssüfləndiyini bildirib.
Bu gün isə Ukrayna Prezidenti Ofisinin rəhbəri Kiril Budanov rəsmi Varşavanın bu cür ehtiyatsız hərəkətləri fonunda Polşa Respublikasının dövlət mükafatını, Polşa Prezidentinin ötən il ona təqdim etdiyi Polşaya Xidmətə görə “Qızıl Zabit Xaç” ordenindən imtina etdiyini açıqlayıb.
"Təəssüf ki, Polşa Prezidenti Karol Navrotskiy Ukrayna Prezidentini əvvəllər təltif etdiyi ordendən məhrum etməklə xalqımıza qarşı qeyri-dost hərəkət etdi. Xalqlarımızın uzunmüddətli münasibətləri və tarixin müxtəlif fəsilləri var - həm qəhrəmanlıq, həm də faciəvi. Lakin bu, kobud siyasi fərziyyələr deyil, dərin düşüncələr üçün səbəb olmalıdır. Ukrayna heç bir millətə öz tarixini necə öyrənməyi diktə etmir. Buna görə də biz öz milli yaddaşımıza və ləyaqətimizə olan haqlı hüququmuzu da özümüzdə saxlayırıq", - deyə Budanov əlavə edib.
Budanov Polşa Prezidentinin bu jestinin ədalət və ya bu kimi şeylərlə heç bir əlaqəsi olmadığına əminliyini ifadə edib. Misal olaraq, o, italiyalı diktator, Adolf Hitlerin dostu Benito Mussolininin hələ də "Ağ Qartal" ordenindən məhrum edilmədiyini qeyd edib: “Ukrayna, şübhəsiz ki, bu hadisəni qiymətləndirəcək. Amma nə olursa olsun, biz bütün müttəfiqlərimizlə açıq tərəfdaşlıq prinsiplərinə qətiyyətlə sadiq qalmağa davam edəcəyik. Lakin bu, qarşılıqlı hörmətə əsaslanan bərabərhüquqlu tərəfdaşlıq olacaq”.
Bölmənin digər xəbərləri
