Ukraynada çıxan nüfuzlu “Den” qəzetində Azərbaycan haqqında “Araz Əzimov: Ukrayna Azərbaycanın dostu və tərəfdaşıdır. Dağlıq Qarabağ ətrafında münaqişənin tənzimlənməsi problemi Cənubi Qafqazın ağrılı yeridir” sərlövhəli material dərc edilmişdir
Kiyev, 13 oktyabr (AZƏRTAC). Ümumukrayna miqyaslı nüfuzlu gündəlik “Den” qəzeti bu gün (№ 184, 13 oktyabr 2011) Azərbaycana həsr edilmiş “Araz Əzimov: Ukrayna Azərbaycanın dostu və tərəfdaşıdır. Dağlıq Qarabağ ətrafında münaqişənin tənzimlənməsi problemi Cənubi Qafqazın ağrılı yeridir” sərlövhəli məqalə dərc etmişdir.
Ukrayna qəzetinin xüsusi müxbiri Yuri Rayxel Azərbaycanın dövlət müstəqilliyinin bərpa edilməsinin 20 illiyi ərəfəsində Azərbaycanın xarici işlər nazirinin müavini, Dağlıq Qarabağ probleminin tənzimlənməsi üzrə Azərbaycan Prezidentinin xüsusi nümayəndəsi Araz Əzimovdan eksklüziv müsahibə almışdır.
Materialda Ermənistan-Azərbaycan, Dağlıq Qarabağ münaqişəsində vəziyyət, Azərbaycan ilə Ermənistan arasında münasibətlərin hazırda ərazisinin 20 faizinin işğal altında olan Azərbaycanın ərazi bütövlüyünün danışıqsız tanınmasını nəzərdə tutan beynəlxalq hüquq prinsipləri əsasında tənzimlənməsi məsələsi obyektiv təhlil edilir.
Araz Əzimov vurğulayır: “Biz münaqişənin tənzimlənməsi üçün bundan sonra da siyasi səy göstərməyə hazırıq. Lakin bu halda Minsk qrupu çərçivəsində həyata keçirilmiş, son vaxtlar Rusiya Prezidenti Dmitri Medvedevin fəal iştirakı ilə həyata keçirilməkdə davam edən danışıqlar prosesinin səmərəsinin olmaması məsələsi qarşıya çıxır”.
Azərbaycanlı diplomat vurğulayır: “Təəssüf ki, Kazanda nəticə əldə edilmədi və bundan sonra müəyyən pauza təsəvvürü yarandı. Buna baxmayaraq cari ilin avqust ayında Soçidə prezidentlər Əliyev və Medvedevin görüşü oldu və biz ümid edirik ki, Rusiya bu görüşün yekunlarına əsasən öz fəaliyyətini təshih edəcək və Minsk qrupunun digər iki həmsədri ilə birlikdə prosesi fəallaşdırmağa çalışacaqdır”.
Müsahibədə Araz Əzimovun aşağıdakı sözləri də sitat gətirilir: “...Biz Ermənistan prezidentindən getdikcə daha aşkar təhrikçilik təsiri bağışlayan davakar xarakterli bəyanatlar eşidirik. Onun Nyu-Yorka son səfəri zamanı Dağlıq Qarabağın müstəqilliyini tanımağın zəruri olması barədə bəyanatını nəzərdə tuturam. Biz həm də Ermənistanın silah, özü də hücum silahı almaq üçün inadkar cəhdləri ilə üzləşirik”.
Qəzetin xüsusi müxbiri Y.Rayxelin “Beynəlxalq miqyasda tanınmış vasitəçilər var. Onların səyləri hələlik hər hansı konkret nəticəyə gətirib çıxarmamışdır. Azərbaycan danışıqların formatını dəyişməyi zəruri hesab etmirmi (axı belə təkliflər səslənmişdir) və münaqişədən çıxış yolları tapmaq üçün başda məkanlar axtarmaq istəmirmi?” sualına A.Əzimov belə cavab vermişdir: “Əgər hər hansı başqa münaqişə barədə söhbət getsəydi, belə bir imkanı müzakirə etmək olardı. İndiki halda isə 1975-ci il Helsinki aktı əsasında fəaliyyət göstərən ATƏT-in Minsk qrupu vardır. ABŞ, Fransa və Rusiya Minsk qrupunun üzvləridir və onlara həmsədr vəzifələri həvalə edilmişdir. Digər tərəfdən, bu ölkələr həm də BMT Təhlükəsizlik Şurasının daimi üzvləridir. İstər Minsk qrupu olsun, istər Təhlükəsizlik Şurası - mən onların arasında ciddi fərq görmürəm. Minsk qrupu Dağlıq Qarabağ münaqişəsinin tənzimlənməsinə dair danışıqlar prosesinin hamılıqla tanınmış forumudur. Təhlükəsizlik Şurasının 1993-cü ildə qəbul edilmiş qətnamələri işğal edilmiş ərazilərin azad olunmasına, qaçqınların qayıtmasına və bir sıra başqa tədbirlərin həyata keçirilməsinə yönəlmişdir. Buna görə də hesab edirik ki, problemlər Minsk qrupu çərçivəsində müzakirə olunmalı və həll edilməlidir. Bu baxımdan, Azərbaycan həmin qətnamələrin yerinə yetirilməsinin tərəfdarıdır, onlar bütöv və tam halda qəbul edilməlidir. Təbii ki, biz Minsk qrupunun formatını dəyişmək fikrində deyilik. Bu qrup çevikliyi təmin edir. İştirakçı dövlətlərin indiki statusunu nəzərə alsaq, həmin qrupda Dağlıq Qarabağ regionunun əhalisinin - həm erməni, həm azərbaycanlı əhalinin nümayəndələrinin iştirakı mümkündür. Bax bu məqam Minsk qrupunun formatında hələlik nəzərə alınmır. Yerevanda möhtəkirlik edirlər ki, guya biz Qarabağ erməniləri ilə əlaqələrdən çəkinirik. Biz belə əlaqələrdən çəkinmirik, lakin bu yalnız o halda olacaqdır ki, danışıqlar prosesi bilavasitə Dağlıq Qarabağ ermənilərinə və azərbaycanlılarına aid mövzulara gəlib çatsın. Onda Minsk qrupu çərçivəsində bu cür format təmin ediləcəkdir”.
Müsahibədə Azərbaycan ilə Ukrayna arasında qarşılıqlı faydalı sıx dostluq münasibətləri vurğulanır.
A.Əzimov demişdir: “Ukrayna Azərbaycanın dostu və tərəfdaşıdır. Bu iki xalq ikitərəfli və regional baxımdan çoxdan dostluq edir. Son 20 ildə biz yaxın strateji tərəfdaşlar kimi, iki müstəqil dövlət kimi qarşılıqlı fəaliyyətdəyik. Biz həm də GUAM regional təşkilatının üzvləriyik. Azərbaycan kimi, Ukrayna da ATƏT-in üzvüdür. Buna görə də tərəfdaşlıq və əməkdaşlıq mənafelərini nəzərə alaraq, Ukraynanın bu problemin tezliklə tənzimlənməsində maraqlı olması üçün bütün nöqteyi-nəzərlərdən hər cür əsas vardır”.
Jurnalist məlum münaqişənin tənzimlənməsində Ukraynanın rolu barədə sual vermişdir. Azərbaycan xarici siyasət idarəsinin rəhbərinin müavini bu sualın cavabında demişdir: “Biz bilirik ki, Ukrayna bu münaqişənin Azərbaycanın ərazi bütövlüyü əsasında həllini dəstəkləyir. Vaxtilə Ukrayna bizim ölkəyə təminat verirdi ki, ATƏT-in çoxmillətli qüvvələri tərəfindən sülhyaratma əməliyyatı keçiriləcəyi təqdirdə Ukrayna həmin əməliyyatda iştirak etməyə hazırdır.
Bundan əlavə, Ukraynanın bu münaqişənin həllində və Avropadakı digər münaqişələrin tənzimlənməsinin daha dəqiq perspektivlərində marağı olması üçün hər cür əsas vardır. Onun yaxın gələcəkdə ATƏT-də sədrlik etməsi də az rol oynamır. Bu işdə Ukraynaya hər cür uğurlar diləmək istərdik”...
Ukrayna, rus və ingilis dillərində çıxan “Den” qəzetinin müsahibəsinin elektron versiyası ilə aşağıdakı saytda tanış ola bilərsiniz: http://www.day.kiev.ua.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
