Ukraynada üç ay ərzində koronavirusa yoluxan xəstələrin sayı üç dəfə artıb
Kiyev, 17 avqust, AZƏRTAC
Ukraynada avqustun 10-dan 16-dək 1991 nəfər COVID-19 virusuna yoluxub ki, bu da may ayının (742 xəstə) müvafiq dövrü ilə müqayisədə təqribən üç dəfə çoxdur.
AZƏRTAC xəbər verir ki, bu barədə brifinq zamanı Ukraynanın Səhiyyə naziri Maksim Stepanov məlumat verib.
Onun sözlərinə görə, xəstəxanalara vəziyyəti ağır və orta ağır olan xəstələr, yəni oksigen terapiyasına və ya reanimasiyaya ehtiyacı olanlar qəbul edilir. Ukrayna həkimləri koronavirus epidemiyasının ölkədə yayılmasının ilk dövrü ilə müqayisədə indi daha çox sayda xəstəyə yardım göstərə bilirlər.
Ukrayna Səhiyyə Nazirliyinin son məlumatına görə, ölkədə laboratoriya şəraitində 92 min 820, o cümlədən sutka ərzində 1464 nəfərdə COVID-19-a yoluxma faktı aşkarlanıb. Koronavirusdan sağalanların sayı 48 min 164 nəfər, aktiv xəstələrin sayı isə 42 min 567 nəfərdir.
Rüstəm Məmmədov
Kiyev
Bölmənin digər xəbərləri
