Ukraynadakı vəziyyətlə əlaqədar bu ölkədəki Azərbaycan vətəndaşlarının təxliyəsi davam edir
Bakı, 7 mart, AZƏRTAC
Ukraynadakı vəziyyətlə əlaqədar bu ölkə ərazisində daimi və müvəqqəti yaşayan, səfərdə olan Azərbaycan vətəndaşlarının qonşu ölkələrin ərazisindən keçməklə respublikamıza təxliyəsi davam edir.
Xarici İşlər Nazirliyinin Mətbuat xidməti idarəsindən AZƏRTAC-a bildiriblər ki, martın 7-dək Azərbaycana 3138 nəfər təxliyə olunub. Onların arasında çarter reysləri vasitəsilə təxliyə olunanların sayı 1908, quru yolu ilə ölkəmizə gətirilənlərin sayı isə 1263 nəfər təşkil edir.
Vətəndaşlarımızın təxliyəsi üçün Azərbaycan hökuməti tərəfindən əksəriyyəti Rumıniyanın Yassi şəhərindən olmaqla, Rumıniya və Polşa ərazisindən indiyədək 10 çarter reysi təşkil olunub. Bu reyslərlə əsasən qadınlar, uşaqlar, yaşlılar, xəstələr və digər həssas qrupa daxil olan vətəndaşlarımızın təxliyəsinə üstünlük verilib.
Vətəndaşlarımızın həm çarter reysləri, həm də qonşu ölkələrin ərazisindən keçməklə avtobuslarla təxliyəsi davam edəcək.
Bölmənin digər xəbərləri
