Ukraynanın nüfuzlu nəşri Qarabağdan xüsusi reportaj hazırlayıb
Kiyev, 6 sentyabr, AZƏRTAC
Ukraynanın nüfuzlu “Telegraf” nəşrində Qarabağdan xüsusi reportaj dərc edilib.
AZƏRTAC xəbər verir ki, “Laçın dəhlizi və Qarabağ probleminin həlli: Azərbaycan problemli regionun öhdəsindən necə gəlir?” sərlövhəli məqalədə ukraynalı jurnalist gördüklərini qələmə alıb.
Məqalədə qeyd olunur ki, 44 günlük İkinci Qarabağ müharibəsinin başa çatmasından təxminən üç il keçməsinə baxmayaraq Qarabağda vəziyyət hələ də gərgin olaraq qalır. Bu dəfə münaqişənin növbəti dəfə kəskinləşməsi Laçın dəhlizi adlanan yer üzündən baş verib. Azərbaycan tərəfinin fikrinə görə, ermənilər bu dəhlizdən qaçaqmal daşımaq üçün istifadə edirlər.
“İşğaldan azad olunandan sonra göründü ki, Qarabağ ərazilərinin bir hissəsi qismən xəyal şəhərləridir. Ağdam və Füzuli faktiki olaraq yer üzündən silinib. Məsələn, Füzulidə bir dənə də olsun bütöv bina qalmayıb, Ağdama, ümumiyyətlə, xəyallar şəhəri deyirlər. Yalnız yerli məscidin binası salamat qalıb və ona görə ki, Azərbaycan tərəfinin fikrincə, buradan ermənilər tərəfindən müşahidə məntəqəsi kimi istifadə edilib. Rayondakı qəbiristanlıq da dağıdılıb. Hərbçilər hətta qəbirləri dağıdaraq meyitlərin kəllə sümüyündən qızıl dişlərini çıxarıblar”, - deyə ukraynalı jurnalist yazır.
Qeyd edir ki, həmçinin Qarabağ bölgəsində müharibədən sonra da azərbaycanlıların kütləvi məzarlıqları tapılır. Bu günə kimi 10-dan çox kütləvi məzarlıq tapılıb. Yerli prokurorluqda deyildiyi kimi, kütləvi məzarlıq daha çoxdur.
Vurğulanır ki, bölgənin başqa bir problemi böyük bir ərazinin minalanmış sahəsidir. Ağdam və Füzuli ən çox minalanmış ərazilərdir və ümumilikdə minatəmizləmə prosesi gedir. Minatəmizləmə işləri ən azı on il davam edəcək və bu iş üçün təxminən 25 milyard dollara ehtiyac var. Təqribi hesablamalara görə, orada ən azı bir milyon mina var ki, bu da təxminən Qətər və ya Livan ərazisi boyda yerdə basdırılıb. 2020-ci ildən bəri mina partlayışları nəticəsində 300-dən çox insan xəsarət alıb, 50 nəfər mina qurbanı olub.
Məqalədə daha sonra yazılır: “Daha bir şəhər - gələcəkdə regionun turizm incisinə çevrilə biləcək Laçın da qismən dağıdılıb və 30 il ərzində ermənilər tərəfindən işğal altında saxlanılıb. Birinci Qarabağ müharibəsinə qədər burada 80 min, indi isə 700 nəfər yaşayır. Bu şəhərə səfəri zamanı “Teleqraf”ın jurnalisti Laçını tərk edəndən 30 il sonra geri qayıdan böyük bir ailəni öz gözləri ilə görüb. İşğal təhlükəsi ilə üzləşən bütün azərbaycanlılar Qarabağ ərazisini tərk edərək 30 il öz yurd-yuvalarına, doğma yurdlarına qayıtmalarını səbirsizliklə gözləyirdilər. Sonradan ermənilər tərəfindən işğal edilən bölgədə bir nəfər də olsun azərbaycanlı qalmayıb. Ümumiyyətlə, Azərbaycan dağıdılmış 9 şəhəri 2040-cı ilə qədər bərpa etməyi planlaşdırır. 2026-cı ilin sonunadək 35 min ailənin işğaldan azad edilmiş ərazilərə qaytarılması planlaşdırılır”.
Yazıda bildirilir ki, indi rayonun ən problemli yerlərindən biri Laçın şəhəri yaxınlığındakı Laçın dəhlizi adlanan yerdir. Ermənilər “blokada” olduğunu iddia edirlər, lakin bu, doğru deyil, çünki erməni etnik azlıqlar asanlıqla keçə bilirlər. Bunu “Teleqraf”ın jurnalisti öz gözləri ilə görüb.
Məqalədə diqqətə çatdırılır ki, rəsmi Bakı faktiki olaraq Laçın dəhlizinin bir hissəsi olan Həkəri körpüsündə nəzarət-buraxılış məntəqəsi qurub. Hazırda Qarabağ ərazisində 10 minə qədər erməniəsilli əsgər var və o bölgədə tapılan Ermənistan istehsalı olan minaların bir qismi son illərə aiddir ki, bu da həmin minaların sonradan gətirildiyini sübut edir. Bu faktlar həm Ukrayna, həm də Qərb tərəfinin media nümayəndələri tərəfindən dəfələrlə sənədləşdirilib. Bundan əlavə, mövcud məlumatlara görə, qaçaqmalların çatdırılması üçün hətta Beynəlxalq Qırmızı Xaç Komitəsinin avtomobillərindən də istifadə olunub.
AZƏRTAC-ın xüsusi müxbiri
Kiyev
Bölmənin digər xəbərləri
