Ukraynanın paytaxtında 20 Yanvar şəhidlərinin nurlu xatirəsi yad edilmişdir
Kiyev, 21 yanvar (AZƏRTAC). Yanvarın 20-də Kiyevdəki Ukraynada Azərbaycanlı Gənclər İttifaqının (UAGİ) Gənclik Mərkəzində Qara Yanvar faciəsinin 24-cü ildönümünə həsr olunmuş tədbir keçirilmişdir.
Azərbaycan Respublikasında Ümumxalq Hüzn Günü çərçivəsində keçirilən, 1990-cı il 20 Yanvar şəhidlərinin xatirəsini anma mərasimini ölkəmizin Ukraynadakı səfirliyinin dəstəyi ilə UAGİ təşkil etmişdir.
Əvvəlcə moderator, UAGİ-nin rəhbəri Anar Tahirov tədbir iştirakçılarından həlak olmuş qəhrəmanların xatirəsini bir dəqiqəlik sükutla yad etməyi xahiş etmişdir. Sonra Rusiya telejurnalistlərinin lentə aldıqları, Azərbaycan xalqının tarixində ən qanlı hadisələrdən olan 20 Yanvara həsr edilmiş sənədli film göstərilmişdir.
Dəhşətli kadrların nümayişindən sonra anma mərasimində çıxış edən Azərbaycanın Ukraynadakı diplomatik nümayəndəliyinin müşaviri Nazim Əliyev səfir Eynulla Mədətlinin və şəxsən öz adından şəhidlərin doğmalarının və yaxınlarının ailələrinə dərin hüznlə başsağlığı vermişdir.
O demişdir ki, hər bir xalqın tarixində istər faciəli anlar, istərsə də qəhrəmanlıq səhifələri olur. Nadir hallarda bu iki an bir-biri ilə üst-üstə düşür. Azərbaycan xalqı 1990-cı ilin Qanlı Yanvarını faciəli və qəhrəmanlıq səhifəsi kimi yaşamışdır.
Diplomat çıxışın sonunda demişdir: “Bu gün biz Azərbaycanın qəhrəman oğul və qızlarının nurlu xatirəsini yad edərkən fəxrlə bildiririk ki, Azərbaycan Respublikasının müstəqilliyinin bərpa olunmasından 23 il keçmişdir. Müstəqil Azərbaycan Respublikası beynəlxalq birlikdə layiqli yer tutmuş və bütün dünyaya sübut etmişdir ki, onun müstəqilliyi əbədidir, dönməzdir!”.
Daha sonra çıxış edən Anar Tahirov, Kiyev Milli Linqvistika Universiteti nəzdindəki Azərbaycan Dili və Ədəbiyyatı Mərkəzinin rəhbəri, professor Rafiq Novruzov, Ukrayna Azərbaycanlıları birləşmiş Konqresinin sədri Rövşən Tağıyev, Azərbaycan Respublikası Dövlət Neft Şirkətinin Kiyevdəki nümayəndəliyinin top-meneceri Həzi Aslanov, “Akkord” tikinti-sənaye investisiya korporasiyasının Ukraynadakı nümayəndəsi Sahib Məmmədov, “İşıq” cəmiyyətinin rəhbəri Əbülfəs Qasımov, Xaricdə Təhsil Alan və Məzun Olmuş Gənclərin Beynəlxalq Forumunun həmtəsisçisi Rüfət Əzizov və UAGİ sədrinin müavini İlhamə Allahverdiyeva xüsusi vurğulamışlar ki, Azərbaycanın müstəqilliyi uğrunda canından keçmiş qəhrəmanların adları ölkənin mübarizə salnaməsinə qızıl hərflərlə həkk olunmuşdur. 20 Yanvar isə azadlığın, müstəqilliyin və Azərbaycanın ərazi bütövlüyünün rəmzinə çevrilmişdir.
“20 Yanvar şəhidlərinin xatirəsi önündə baş əyirik. Lakin vüqarlı və azadlıqsevər Azərbaycan xalqı öz kədəri ilə baş-başa qalmamışdır. Etibarlı və sadiq ukraynalı dostlarınız daim sizin yanınızdadırlar”, - bu fikir Ümumukrayna Gənclər Assambleyasının nümayəndəsi Andrey Şelepnitski, Ukrayna Tələbələr Birliyinin sədri Dmitri Bulayev, Ümumukrayna Gənclər Assambleyasının baş katibi Nataliaya Pedçenko, T.Şevçenko adına Kiyev Milli Universiteti Beynəlxalq Münasibətlər İnstitutunun tələbəsi Veronika Kaleniç və başqalarının çıxışlarında diqqəti cəlb edən məqam olmuşdur.
Xatirə tədbirinin sonunda iştirakçılar 20 Yanvar faciəsini əks etdirən fotostend, həmçinin Heydər Əliyev Fondunun nəşrləri ilə tanış olmuşlar.
Tədbirdə Ukraynadakı səfirliyimizin əməkdaşları, Azərbaycan silahlı qüvvələrinin Ukraynadakı hərbi attaşesi, polkovnik Daşdəmir Məmmədov, UAGİ-nin rəhbərliyi və fəalları, Ukrayna Rəssamlar İttifaqının üzvü Rasim Seydimov, diasporumuzun, Ukrayna ictimaiyyətinin təmsilçiləri, Kiyevdəki ali məktəblərin azərbaycanlı tələbələri, eləcə də onların ukraynalı həmyaşıdları, yerli və Azərbaycan KİV-lərinin nümayəndələri iştirak etmişlər.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
