Ukraynanın üçüncü Prezidenti də Polşanın ali ordenindən imtina edib
Kiyev, 20 iyun, AZƏRTAC
Ukraynanın üçüncü Prezidenti Viktor Yuşşenko Polşanın “Ağ qartal” ordenindən imtina etmək qərarına gəlib. Səbəb onun hazırkı Polşa liderinin Ukrayna Prezidenti Volodimir Zelenskini bu mükafatdan məhrum etmək qərarı ilə razılaşmaması olub.
AZƏRTAC xəbər verir ki, bu açıqlamanı Yuşşenko sosial media səhifəsində yayıb.
Yuşşenkonun sözlərinə görə, mükafat təkcə konkret bir şəxsə təqdim olunmayıb, həm də azadlığı, müstəqilliyi və öz dövlətində yaşamaq hüququ üçün son dərəcə yüksək qiymət ödəyən Ukrayna xalqına hörmət əlaməti olub.
"Buna görə də bu qərarı yenidən nəzərdən keçirmək cəhdləri bu gün bir siyasətçiyə münasibətdən daha çox şeyə gətirib çıxarır. Bunlar qaçılmaz olaraq hər gün cəbhə xəttində ölkələrini müdafiə edən, arxa cəbhədə qələbə üçün çalışan və bu müharibədə ən əzizlərini itirən milyonlarla ukraynalıya təsir göstərir", - deyə açıqlamada bildirilib.
O, Rusiya işğalının ilk aylarından Polşanın uzatdığı kömək əlini heç vaxt unutmayacağını vurğulayıb. Eyni zamanda, xatırladıb ki, bu gün ukraynalılar yalnız öz ölkələrini deyil, daha çoxunu müdafiə edirlər.
"Qoşunlarımız bütün Avropanın şərq sərhədini müdafiə edir. Ukrayna-Polşa birliyini zəiflədən istənilən addım nəticədə Kremlin xeyrinə işləyir", - deyə Yuşşenko vurğulayıb.
Qeyd edək ki, etiraz əlaməti olaraq Ukraynanın sabiq Prezidenti Leonid Kuçma da Polşanın ali ordenindən imtina edib.
Bölmənin digər xəbərləri
