Ukraynanın Vinnitsa şəhərində hepatit A epidemiyası baş verib
Kiyev, 24 oktyabr, AZƏRTAC
Ukraynanın Vinnitsa şəhərinin rayonlarından birində hepatit A epidemiyası baş verib.
AZƏRTAC xəbər verir ki, bu barədə Ukrayna Səhiyyə Nazirliyi məlumat yayıb.
“Hepatit A diaqnozu təsdiqlənmiş 60 nəfər xəstəxanaya yerləşdirilib, onlardan 14-ü uşaqdır. Daha 14 xəstə isə nəzarət altındadır və diaqnozun təsdiqini gözləyir", - məlumatda belə deyilir.
Hazırda ekspertlər epidemiyanın bütün mümkün mənbələrini və səbəblərini - kortəbii bazarlardan tutmuş mərkəzləşdirilmiş su təchizatı məntəqələrinədək - yoxlayır və araşdırır.
Laboratoriya müayinəsi üçün indiyədək 66 su nümunəsi götürülüb (ictimai içməli su mənbələrindən, şəxsi quyulardan, içməli su satış məntəqələrindən və ya paylayıcı şəbəkələrdən), onlardan 53-ü artıq yoxlanılıb və sanitar normalara uyğun olduğu təsdiqlənib.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
