Ulu Öndərin 100 illiyi münasibətilə tədbir - “Heydər Əliyev – həmişəyaşar lider”
Bakı, 22 may, AZƏRTAC
Muzey Sərvətləri və Xatirə Əşyalarının Elmi Bərpa Mərkəzi (MSXƏEBM) Ümummilli Lider Heydər Əliyevin 100 illik yubileyi münasibətilə “Heydər Əliyev - həmişəyaşar lider” adlı dəyirmi masa keçirib.
Mərkəzdən AZƏRTAC-a bildirilib ki, tədbir Ulu Öndərin respublikaya rəhbərliyi dövründə muzey sahəsinə göstərdiyi diqqət və qayğının təbliği, Heydər Əliyev irsinin tədqiqi və müasir muzey sahəsinin inkişaf istiqamətlərinin öyrənilməsi məqsədilə təşkil olunub. .
MSXƏEBM-nin direktoru, Əməkdar mədəniyyət işçisi Zərifə Məlikova çıxış edərək respublikamızda, eyni zamanda, respublikamızın hüdudlarında Ulu Öndər Heydər Əliyevin 100 illik yubileyi ilə əlaqədar keçirilən tədbirlərin əhəmiyyətindən, muzey sahəsinə olan diqqətindən danışıb.
Sonra qonaqlar Mərkəz tərəfindən hazırlanmış “Heydər Əliyev və muzeylərimiz” adlı videoçarxa baxıblar.
MSXƏEBM-nin baş mühafizi Pakizə Almazova Heydər Əliyevin respublikaya rəhbərliyi dövründə muzeylər şəbəkəsinin yaradıldığını, muzey sahəsinə xidmət edəcək təşkilatlar sırasında 1980-cı ildə Muzey Sərvətləri və Xatirə Əşyalarının Elmi Bərpa Emalatxanasının “Mərkəz” adlandırılaraq fəaliyyətinın genişləndirildiyini, bununla da muzey işində inkişaf mərhələlərinin, muzey işi tarixinin çiçəklənmə dövrünün başlandığını qeyd edib.
Uzun illər muzey sahəsində çalışmış Əməkdar incəsənət xadimi Məhəbbət Mehdiyeva Ulu Öndərin muzey sahəsinə, xalqımızın mədəni irsinə olan diqqətini xüsusi qeyd edərək, onunla görüşlərindən və xatirələrindən bəhs edib.
Naxçıvan şəhərindəki Heydər Əliyev Muzeyinin direktoru, Əməkdar mədəniyyət işçisi Ramil Orucəliyev hələ 1999-cu ildə Heydər Əliyevin sağlığında yaradılan ilk muzeyin fəaliyyət istiqamətlərindən söz açıb. Muzeyin əsas fondunda 5000 eksponatın toplanıldığı, Ulu Öndərin həyatını, siyasi fəaliyyətini əks etdirən ekspozisiya zalları barədə məlumat verib.
Tədbir çərçivəsində Bakı şəhərindəki Cəfər Cabbarlının ev-muzeyinin direktoru Qəmər Cabbarlı, Yasamal Heydər Əliyev Mərkəzinin direktoru Naminə Ömərova, C.Məmmədquluzadə adına Naxçıvan Muxtar Respublikası Ədəbiyyat Muzeyinin direktoru Aləmzar İbrahimova, Bəhruz Kəngərlinin ev-muzeyinin direktoru Səbinə Əlincəli Ümummilli Lider haqqında xatirələrini bölüşüblər. Cəfər Cabbarlının ev- muzeyinin direktoru, Əməkdar mədəniyyət işçisi Qəmər Cabbarlı Heydər Əliyevin Azərbaycanın görkəmli şəxsiyyətlərinə qarşı xüsusi diqqət və qayğısından, 1982-ci ildə Cəfər Cabbarlının ev-muzeyinin təntənəli açılışında Ulu Öndərlə olan xatirələrindən söz açıb.
Tədbirdə Heydər Əliyevin təşəbbüsü ilə yaradılan muzeylərin MSXƏEBM-də bərpa olunmuş kolleksiyalarının “Bərpa olunmuş mədəni irsimiz” və “Əbədi lider” adlı təqdimatları keçirilib.
Bölmənin digər xəbərləri
