“Ulu yurdum Naxçıvanım” mövzusunda keçirilən inşa yazı müsabiqəsinin qalibləri müəyyənləşib
Naxçıvan, 10 fevral, AZƏRTAC
Naxçıvan Muxtar Respublikasının yaradılmasının 97-ci ildönümü ilə əlaqədar muxtar respublikanın ümumtəhsil məktəblərinin şagirdləri arasında “Ulu yurdum Naxçıvanım” mövzusunda keçirilən inşa yazı müsabiqəsinin qalibləri müəyyənləşib.
Muxtar respublikanın Təhsil Nazirliyinin mətbuat xidmətindən AZƏRTAC-ın Naxçıvan bürosuna bildirilib ki, bu münasibətlə keçirilən tədbirdə çıxış edən təhsil nazirinin müavini Heyran Əhmədova Azərbaycanın ayrılmaz tərkib hissəsi olan Naxçıvan Muxtar Respublikasının yaradılmasından və çox mürəkkəb tarixi inkişaf yolundan bəhs edib. Bildirib ki, Naxçıvanın muxtariyyətinin yaranması onun çoxəsrlik dövlətçilik ənənələrinin davamıdır. Qədim diyar beş min ildən çox şəhərsalma mədəniyyətinə malikdir. Tarixboyu Naxçıvan müxtəlif imperiyaların maraq dairəsində olsa da, heç bir işğalçı ordu naxçıvanlıların iradəsini qıra bilməyib.
Vurğulanıb ki, çoxəsrlik dövlətçilik ənənələri olan Naxçıvan xalqımızın zəngin mədəni irsini layiqincə yaşadıb. Bu torpaq Azərbaycana, dünyaya xalqımızın görkəmli şəxsiyyəti olan Heydər Əliyevi bəxş edib. Naxçıvan həm də Azərbaycan xalqının tarixini əks etdirən abidələri özündə cəmləşdirən bir diyardır.
İnşa yazı müsabiqəsində muxtar respublikanın ümumtəhsil məktəblərinin IX-XI siniflərində təhsil alan 34 şagird iştirak edib. Şagirdlər 2 saat ərzində Naxçıvan Muxtar Respublikasının dünəni və bu gününü, inkişafını, təhsilini, tarixi abidələrini, təbiətini, milli-mənəvi dəyərlərini, görkəmli şəxsiyyətlərini tərənnüm edən mövzularda inşa yazıblar. İnşa yazıları münsiflər heyəti tərəfindən yoxlanılaraq qiymətləndirilib.
Nəticələrə əsasən, Ordubad şəhər 1 nömrəli tam orta məktəbin XI sinif şagirdi Rübab Əliyeva I, Şərur Şəhər Fizika-Riyaziyyat Təmayüllü Liseyin IX sinif şagirdi İsa Abdullayev və Kəngərli rayon Təzəkənd tam orta məktəbinin XI sinif şagirdi Nigar Babayeva II, Ordubad şəhər 3 nömrəli tam orta məktəbin IX sinif şagirdi Səma Quliyev III, Naxçıvan şəhər Heydər Əliyev adına tam orta məktəbin XI sinif şagirdi Nəzrin Əliyarova və Kəngərli rayon Yurdçu kənd tam orta məktəbin IX sinif şagirdi Günay Abbasova isə həvəsləndirici yerə layiq görülüblər.
Bölmənin digər xəbərləri
