Unai Emeri “Arsenal” klubunun baş məşqçisi vəzifəsinə təyin olunub
Bakı, 23 may, AZƏRTAC
Rusiyanın “Spartak”, İspaniyanın “Sevilya” və Fransanın PSJ klublarının sabiq çalışdırıcısı Unai Emeri İngiltərənin “Arsenal” futbol komandasının məşqçisi təyin olunub.
AZƏRTAC TASS informasiya agentliyinə istinadla xəbər verir ki, bu barədə məlumat London klubunun rəsmi saytında yerləşdirilib.
“Arsenal”ı 22 il çalışdırmış fransalı mütəxəssis Arsen Venger bu mövsümün başa çatması ilə klubla yollarını ayırıb.
Qeyd edək ki, 46 yaşlı Emeri keçən mövsüm Fransanın PSJ komandası ilə birgə ölkə çempionatının qalibi adını qazanıb. O, həmçinin paytaxt klubu ilə 2016-cı ildə Fransa kubokuna, ölkə liqası kubokuna (2017) və iki dəfə Fransa super kubokuna (2017, 2018) sahib olub.
Unai Emeri 2012-ci ilin iyununda Moskvanın “Spartak” klubuna baş məşqçi təyin edilsə də, dörd ay sonra “Dinamo” klubuna 1:4 hesablı ağır məğlubiyyətdən sonra komandanı tərk edib. O, 2013-2016-cı illərdə İspaniyanın “Sevilya” klubu ilə ardıcıl üç mövsüm UEFA Avropa Liqasının kubokunu qazanıb.
Bölmənin digər xəbərləri
