Universal döyüşçülərimiz uğurlu çıxışlarını davam etdirirlər
Bakı, 18 aprel, AZƏRTAC
Son illər Azərbaycanda universal döyüş idman növündə yüksək nailiyyətlər əldə olunub. Bu idman növü ilə məşğul olan təmsilçilərimiz qatıldıqları ən mötəbər yarışlardan Vətənə medallarla qayıdırlar. İdmançılarımız indiyədək dünya və Avropa çempionatlarında qızıl, gümüş, bürünc medallar qazanaraq ölkəmizi uğurla təmsil ediblər.
Müxtəlif illərdə ayrı-ayrı yaş qrupları üzrə respublikamızda keçirilən Avropa və dünya çempionatları, birinciliklər, ümummilli lider Heydər Əliyevin xatirəsinə həsr olunan ənənəvi beynəlxalq turnirlər yüksək təşkilatçılığı ilə yadda qalıb. Ötən il Azərbaycan Universal Döyüş Federasiyası (AUDF) üçün uğurlu illərdən olub. İdmançılarımız yerli və beynəlxalq yarışlarda yüksək nəticələr qazanıblar. Federasiya tərəfindən universal döyüşün respublikamızın müxtəlif bölgələrində inkişaf etdirilməsi istiqamətində mühüm işlər görülüb.
AZƏRTAC xəbər verir ki, aprelin əvvəlində Ağdamın Quzanlı qəsəbəsindəki Olimpiya İdman Kompleksində ümummilli lider Heydər Əliyevin anadan olmasının 95-ci ildönümünə həsr edilən universal döyüş üzrə beynəlxalq turnir keçirilib. Yarışda 10 ölkədən 300-dək idmançı iştirak edib. Yarışın açılış mərasimindən əvvəl iştirakçılar ümummilli lider Heydər Əliyevin Quzanlı qəsəbəsindəki abidəsini ziyarət edərək, önünə əklil və gül dəstələri düzüblər.
Yeniyetmə, gənclər və böyüklər arasında keçirilən yarışın yekununa əsasən, Azərbaycan komandası birinci pillədə qərarlaşıb. İkinci və üçüncü yeri isə müvafiq olaraq Rusiya və Gürcüstan komandaları tutublar.
Böyüklərin yarışında 60 kiloqram çəki dərəcəsində qızıl medalı Rusiya təmsilçisi Nikolay Oçkin qazanıb. Digər çəki dərəcələrində Azərbaycan təmsilçiləri Elvin Hüseynov (65 kq), Namiq Məmmədzadə (70 kq), Nicat Əliyev (75 kq), Əli Həsənli (80 kq), Fərid Mirzəbəyev (85 kq), Sürət Hüseynov (90 kq-dan yuxarı), Mehman Hüseynov (95 kq), Allahşükür Fərzəliyev (95 kq-dan yuxarı) birinci olublar. Nodar Liadze (60 kq, Gürcüstan), İrzaq Əliyev (65 kq, Azərbaycan), Fəxri Abbasov (70 kq, Azərbaycan), Saleh Qurbanov (75 kq, Azərbaycan), Yalçın Abdulla (80 kq, Türkiyə), Əliqismət Məmmədov (85 kq, Azərbaycan), Boxtiyar Maşaripov (95 kq, Özbəkistan), Ravid Mirzəbəyev (90 kq), İlham Mahmudov (95 kq-dan yuxarı, Azərbaycan) gümüş medallara sahib olublar.
Beynəlxalq turnirin təşkili ilə bağlı AZƏRTAC-ın əməkdaşına ətraflı məlumat verən AUDF-in prezidenti, Beynəlxalq Universal Döyüş Federasiyasının birinci vitse-prezidenti Azər Həsənov ölkəmizdə idmana göstərilən diqqət və qayğıdan söz açaraq deyib: “Dövlətimizin başçısı, Milli Olimpiya Komitəsinin prezidenti İlham Əliyevin diqqət və qayğısı sayəsində ölkəmizdə idman sürətlə inkişaf edib. Respublikamızda Olimpiya idman növləri ilə yanaşı, qeyri-Olimpiya idman növlərinə də dövlət tərəfindən yüksək diqqət və qayğı göstərilir. Gənclər və İdman Nazirliyi, Azərbaycan Universal Döyüş Federasiyasının təşkilatçılığı ilə ölkəmizdə indiyədək bu növ üzrə bir sıra mötəbər beynəlxalq turnirlər təşkil edilib. Yığmanın üzvləri Avropa və dünya çempionatında, beynəlxalq turnirlərdə mükafatçılar sırasında yer alıblar. Bu il ənənəyə uyğun olaraq federasiya tərəfindən Ağdamda ümummilli lider Heydər Əliyevin xatirəsinə həsr olunmuş beynəlxalq turnir keçirildi. Belə yarışların təşkili ölkəmizdə universal döyüşün inkişafına və təbliğinə xidmət etməklə yanaşı, yeniyetmə və gənclərin hərbi-vətənpərvər ruhunda böyümələrinə şərait yaradır. İndiyədək biz bir sıra yarışları bölgələrdə keçirmişik. Hazırda respublikamızın 60 bölgəsində federasiyanın nümayəndəliyi fəaliyyət göstərir. Budəfəki yarış cəbhə bölgəsində təşkil olundu. Məqsədimiz regionlarda gənclərin idmana cəlb olunması ilə yanaşı, onların sağlam ruhda böyüməsinə təkan verməkdir. Məhz bu məqsədlə biz yarışa paytaxt idmançıları ilə yanaşı, bölgələrdəki seçmə idmançıları da cəlb etmişdik”.
Turnirdə Rusiya, Gürcüstan, Ukrayna, Türkiyə, İran, Özbəkistan, Litva, Belarus komandalarının üzvlərinin güclü rəqiblərdən olduqlarını vurğulayan A.Həsənov bildirib ki, buna baxmayaraq, idmançılarımız onlara bəslənilən ümidləri doğrultdular. Yarışın yekununa əsasən hər yaş qrupu üzrə yığma komandanın tərkibini müəyyənləşdirdik. Budəfəki yarış cəbhə bölgəsində təşkil olundu. Bu gün Azərbaycan müharibə şəraitindədir. Belə bir idman növü üzrə yarışların məhz cəbhə bölgəsində təşkili yeniyetmə və gəncləri Vətənin müdafiəsinə ruhlandırır, onlarda qələbə əzmini yüksəldir.
A.Həsənov 2017-ci ilin Azərbaycan universal döyüşçüləri üçün uğurlu illərdən biri olduğunu bildirərək deyib: “Yığma komandanın üzvləri builki yarışlarda uğurlu çıxışları ilə yadda qalıblar. Universal döyüşdə yerli və beynəlxalq səviyyəli yarışlar 10-11, 12-13, 14-15, 16-17 və 18 yaşdan yuxarı yaş qrupları üzrə keçirilir. Təmsilçilərimiz bu yaş qrupları üzrə 2017-ci ildə yüksək nailiyyətlər əldə ediblər. Ümumilikdə ötən il universal döyüşçülərimiz beynəlxalq, Avropa və dünya səviyyəli yarışlarda 29 qızıl, 43 gümüş və 43 bürünc medal qazanıblar. Əlbəttə ki, qazanılan uğurlar federasiyanın məqsədyönlü fəaliyyətinin nəticəsidir”.
Məhz bu uğurların nəticəsidir ki, 2017-ci ilin yekunlarına əsasən, AUDF-in prezidenti Azər Həsənov dövlətimizin başçısı, Milli Olimpiya Komitəsinin prezidenti İlham Əliyev tərəfindən fəxri fərman, yığmanın üzvü Nicat Əliyev isə mənzillə mükafatlandırılıb.
Bölmənin digər xəbərləri
