“Uşaqlar üçün ekoloji laboratoriya” layihəsinə start verilib
Bakı, 13 yanvar, AZƏRTAC
IDEA İctimai Birliyi və “Sevimli bala” təşkilatı arasında həyata keçirilən əməkdaşlıq çərçivəsində IDEA və “Sevimli bala” yanvar ayından etibarən 5-12 yaşlı uşaqlar üçün ətraf mühit üzrə maarifləndirmə xarakterli silsilə tədbirlərdən ibarət “Uşaqlar üçün ekoloji laboratoriya” adlı birgə layihəyə start verib.
IDEA İctimai Birliyindən AZƏRTAC-a verilən məlumata görə, layihənin məqsədi uşaqların ətraf mühit və təbiəti daha yaxşı dərk etməsinə yardım etmək və gənc nəslin təbiətə qayğı hissləri ilə yetişməsinə töhfə verməkdən ibarətdir.
“Kiçik ekoloqlar”ın ətraf mühitin mühafizəsinə marağını daha da artırmaq və bu prosesi əyləncəli etmək məqsədilə təlimlərin gedişində laboratoriya tədqiqatları aparılacaq, müxtəlif bilik yarışmaları və maraqlı oyunlar təşkil olunacaq, həmçinin kiçik incəsənət nümunələri yaratmaq üçün şərait yaradılacaq.
“Uşaqlar üçün ekoloji laboratoriya”nın ilk təlimi cari il yanvar ayının 17-də keçiriləcək və qlobal istiləşmə kontekstində buzlaqların əriməsi, dəniz suyunun səviyyəsinin qalxması, heyvanların miqrasiyası və bu hadisələrin təbiətə mənfi təsirinin qarşısının alınması yollarına həsr olunacaq.
IDEA İctimai Birliyinin Azərbaycan Respublikasının Prezidenti yanında Dövlət İdarəçilik Akademiyasında yerləşən Resurs Mərkəzində təşkil olunacaq “Uşaqlar üçün ekoloji laboratoriya”da iştirak etmək istəyənlər IDEA İctimai Birliyi ilə əlaqə saxlaya bilərlər (497-63-16).
Növbəti təlimlər barədə elanlar mütəmadi olaraq mətbuatda veriləcək.
Bölmənin digər xəbərləri
