Naftalan, 3 avqust, Elcan Məmmədov, AZƏRTAC

Azərbaycanda məktəbəqədər təhsil sisteminin müasir tələblər səviyyəsində qurulması, məktəbəqədər yaşlı uşaqların intellektual, fiziki və psixoloji inkişafı üçün lazımi şəraitin yaradılması, onların şəxsiyyətinin formalaşması və məktəbə hazırlanması işinin qabaqcıl beynəlxalq standartlara uyğun təmin edilməsi məsələləri daim dövlətin diqqət mərkəzindədir.

Uşaqların tərbiyə edilməsi dövlət əhəmiyyəti daşıdığı üçün uşaq bağçalarının fəaliyyətinin beynəlxalq standartlara uyğun yenidən qurulması, təmiri və bərpası sahəsində gedən işlər intensiv formada davam etdirilir. Belə bağçalardan biri Prezident İlham Əliyevin iştirakı ilə bu il iyulun 22-də Naftalan şəhərində istifadəyə verilib.

Bildirilib ki, müasir standartlara uyğun qurulan bağçada azyaşlıların təlim-tərbiyəsi və onların sağlam vətəndaş kimi yetişmələri üçün hər cür şərait var. Uşaqların günün əsas hissəsini burada keçirmələri məktəbəqədər təhsil müəssisəsində təlim-tərbiyənin keyfiyyətinə, sağlam ab-havanın yaradılmasına xüsusi diqqət yetirilməsini tələb edir. “Məktəbəqədər təhsil müəssisələrinin inkişafı” proqramı Azərbaycanın uğurlu gələcəyinə hesablanıb. Ən müasir infrastrukturla təchiz edilən körpələr evi-uşaq bağçası Naftalanda sayca ikinci məktəbəqədər təhsil müəssisəsidir. Bu sahədə görülən işlər ölkəmizdə uşaqların sağlam və intellektli böyümələrini təmin edir.

Son illərdə paytaxtla yanaşı, bölgələrimizdə də bir çox uşaq təhsil-tərbiyə müəssisələrində əsaslı təmir və yenidənqurma işləri aparılıb, yeni uşaq bağçaları tikilib. Əsas məqsəd məktəbəqədər təhsil sahəsində əvvəllər mövcud olan çatışmazlıqları aradan qaldırmaqdır.

Naftalan Şəhər İcra Hakimiyyətindən AZƏRTAC-ın bölgə müxbirinə verilən məlumata görə, 200 yerlik yeni uşaq bağçası 11 qrup otağı – 4 körpələr, 7 yuxarı yaş qrupları üçün, həkim otağı, musiqi zalı, gimnastika otağı, mətbəx və personal otağından ibarətdir. Bina müasir avadanlıqlar, invertar və mebel dəstləri, videomüşahidə, yanğın əleyhinə siqnalizasiya sistemləri, internet və telefon xətləri, isti və soyuq su ilə təchiz edilmiş, mərkəzləşdirilmiş istilik sistemi yaradılmışdır.

Həyətyanı sahədə ehtiyat su anbarı, qazanxana, gözətçi məntəqəsi tikilmiş, açıq idman və oyun meydançası, 10 ədəd söhbətgah quraşdırılmış, müasir işıqlandırma sistemi çəkilmiş, asfalt örtük və yaşıllıq zolağı salınmışdır.

Şəhər sakinləri körpələrin təlim-tərbiyəsində və gələcək inkişafında bu cür müəssisələrin rolunun vacib olduğunu bildirib.

“Məktəbəqədərki yaş dövrü uşaqların həyatında xüsusi rol oynayır. Ünsiyyət qabiliyyətlərinin formalaşmasında, söz ehtiyatlarının yaranmasında uşaq bağçasının əhəmiyyətli yeri var. Həmçinin, uşaq evdə ancaq valideynlərini və ətrafını görür. Bağçaların bir üstünlüyü də ondan ibarətdir ki, bağçaya gedən uşaq artıq məktəb dövründə onda gedən müəyyən inkişafda bu özünü göstərir, məktəbə hazır vəziyyətdə gəlir, sosial fobiyası olmur, ağlamır, qışqırmır. Yeni mühitə daha tez öyrəşir, tanımadığı ətrafa daha tez alışır. Buna görə də bağçanın rolu uşağın həyatında əvəzolunmazdır”,- deyə Naftalan şəhər sakini Gülşən Məmmədli bildirib.

Qeyd edək ki, “Təhsil haqqında” qanunda uşaq bağçaları təhsil sisteminin ilk pilləsi kimi təsbit olunub və məktəbəqədər təhsil bir yaşından götürülür.