ÜST bir çox ölkələrdə COVID-19-a epidemioloji nəzarətin azalmasından narahatdır
Bakı, 26 oktyabr, AZƏRTAC
May ayında səhiyyə sahəsində qlobal fövqəladə vəziyyətinin sona çatdığı elan edildikdən sonra Ümumdünya Səhiyyə Təşkilatı (ÜST) bir çox ölkələrdə COVID-19-a epidemioloji nəzarətin azalmasından narahat olduğunu bildirib.
AZƏRTAC xəbər verir ki, ÜST-nin Avropa Regional Bürosunun direktoru Hans Kluge bu bərədə ÜST-nin Avropa Regional Komitəsinin Astanada (Qazaxıstan) keçirilmiş 73-cü sessiyası çərçivəsində mətbuat konfransında danışıb.
“Bir tərəfdən, xüsusilə də qış yaxınlaşdıqca, risk qrupundan olan insanlar, yaşlı insanlar və xroniki xəstəlikləri olan insanlar COVID-19 əleyhinə vaksinin buster dozasını almalıdır. Digər tərəfdən, bütün ölkələr epidemioloji nəzarəti və kontrolu gücləndirməlidir”, - deyə Hans Kluge qeyd edib.
ÜST-nin Avropa Regional Bürosunun direktoru etiraf edib ki, istənilən an daha bir pandemiya peyda ola bilər, lakin əsl məsələ harada və nə vaxt deyil, bu dəfə virusla mübarizəyə daha yaxşı hazır olub-olmayacağımızdan asılıdır.
Hans Kluge həmçinin bildirib ki, virusun yayılması ilə uğurlu mübarizə aparmaq üçün beynəlxalq həmrəylik lazımdır. “Ölkə vaksinləri yalnız işləyib hazırlamalı və qoruyub saxlamalı deyil, həm də onları bölüşməlidir”, - deyə o əlavə edib.
Bölmənin digər xəbərləri
